By Nvidia, AMD dhe kompania Jane Street, janë mes investitorëve të rinj që mbështesin start-up-in e inteligjencës artificiale të shqiptares Mira Muratit, ish-drejtoreshës teknologjike të OpenAI, në një nga raundet fillestare më të mëdha në historinë e Silicon Valley.
Kompania e re, me qendër në San Francisko dhe e quajtur Thinking Machines Lab, mblodhi 2 miliardë dollarë në një vlerësim pas financimi prej 12 miliardë dollarësh në një raund “seed” të udhëhequr nga Andreessen Horowitz. Pjesëmarrës në raund ishin edhe gjigantët e çipave Nvidia dhe AMD, si dhe fondet Accel dhe Jane Street, raporton Financial Times.
Megjithëse kompania nuk ka zbuluar ende detaje mbi produktin ose teknologjinë që po zhvillon, raundi kolosal i financimit tregon besimin e investitorëve në vizionin e Muratit dhe ekipit të saj, që tashmë përfshin ish-punonjës të OpenAI, Google, Meta dhe Mistral.
Jane Street, e njohur për investimet në AI dhe financa të decentralizuara, është gjithashtu aksionere në Anthropic, pas blerjes së aksioneve nga platforma e falimentuar e kriptomonedhave FTX në vitin 2024.
Murati, 36 vjeçe, gjatë kohës së saj në OpenAI luajti një rol kyç në zhvillimin e produkteve si ChatGPT, gjeneruesi i imazheve Dall-E dhe modaliteti i zërit të platformës. Ajo gjithashtu shërbeu për një periudhë të shkurtër si drejtore e përgjithshme e përkohshme e OpenAI gjatë krizës së bordit në nëntor 2023.
Pas largimit të saj nga OpenAI në shtator, Murati deklaroi se dëshironte të “krijonte kohë dhe hapësirë për eksplorimin”. Para kësaj, ajo ka qenë edhe menaxhere produkti në Tesla, ku kontribuoi në zhvillimin e Model X.
