By Toronto-Kanada
I ftuar edhe më herët në Albanian Montreal Press, Ramazan Kellezi është një prej personazheve shqiptarë që ka folur artistikisht për kulturën tonë. Me një karrierë të cilën kujdeset ende ta pasurojë, artisti shqiptar tërheq vëmendjen në çdo moshë dhe kudo. Si ish kryetar i Shoqatës shqiptaro-kanadeze, ai ka ditur ta mirëmbajë dhe zgjerojë standartin e aktiviteteve kulturore. Si ish-Diplomat, Këllezi ende përflitet për meritat e tij, ndërkohë edhe koreograf i Ansamblit të valleve “Shqiponjat e Vogla” në Toronto, aktivitetet me karakter folklorik janë ende në progres. Në saje të të gjithë zhvillimit artistik të tij, edhe çmimet apo titujt do të jenë derivat i suksesit. Në Samitin e Diasporës të mbajtur në Tiranë për afro një muaj më parë, Këllezi e mirëpriti për herë të dytë ftesën duke ndjekur nga afër zhvillimin e saj. Mes shqiptarëve të cilëve u akordua titulli “Ambasador Kombi”, ishte edhe Ramazan Këllezi. Duke mos u ndalur këtu, Stafi i Diplomatic Mission Peace and Prosperity (DMPP) nderuan artistin shqiptar, me titullin “Misionar Paqeje”, Ambasador Nderi i DMPP. Sot, ai do të vij në një intervistë me Albanian Montreal Press, për të ndarë me ne shijen e udhëtimit të fundit në Tiranë.
Z. Këllezi, na tregoni disa të pathëna nga Samiti i Diasporës?
Për t’ju përgjigjur kësaj pyetje do t’i referohem Samitit të 1-re dhe Samitit të 2-të Diasporës. Ky Samit për mendimin tim dështoi, organizim i cili nuk arriti pritshmërinë tonë si dhe mesazhi tepër i politizuar që prezantoi ky Samit, patën një efekt tepër negativ tek pjesëmarrësit që morën pjesë në këtë Samit. Nga Samiti pritej të publikohej lista e personave që do përfaqësonin diasporën pranë Ministrisë së Diasporës, gjë që nuk ndodhi. Që në hapjen e tij në Pallatin Mbretëror, fjala e zbehtë dhe pesimiste e ministrit Majko, na dha mesazhin që asgjë mos prisni nga Qeveria, por vetëm mbështeteni atë me çfarë të mundeni, e kryesisht me vota. Në opinionin tim, zgjedhja e Pandeli Majkos në krye të Ministrisë së Diasporës ishte një gabim i madh, pasi kjo ministri me shumë se sa ajo e Kulturës ( ministrja e re vjen nga diaspora) kishte nevojë për një njëri të shkolluar e të rritur jashtë vendit, që njeh dhe ka provuar mbi shpatulla aventurën e Diasporës, larg politikës dhe bindjeve të saj. Qysh në vizitën e tij në Toronto, Majko mbajti haptas një qëndrim partiak të shëmtuar dhe shprehu nostalgjinë për bashkëpunëtorët e tij të administratës, kur kohë më parë ishte në krye të shtetit si dhe vlerësoi takimet e fshehta me njerëz që i kanë qëndruar besnik atij sistemi famëkeq, përfshi këtu edhe biznesmenë të mirëfilltë, të po së njëjtës kauzë.
Pandeli Majko dhe qeveria që ai përfaqëson, duhet të kuptojnë dhe të vlerësojnë me seriozitet se “kazani” i Diasporës (siç u shpreh kryeministri në fjalen që mbajti në mbrëmjen Gala), i kushton shumë pjesëmarrësve në një aktivitet të tillë si largimi nga puna pa të drejtë pagese, shpenzimet e biletës së avionit, hoteli, ushqimi etj etj… Ky ishte ofendim për ato njerëz që janë integruar në jetën e vendeve që kanë zgjedhur të jetojnë (dhe jo të atyre që asnjëherë nuk u integruan). Duke e përfunduar këtë pyetje mendoj që pjesëmarrja në këtë Samit, ishte humbje kohe dhe shpenzime të kota që na dëmtojnë.
Sipas jush, pse mendoni se u shoqërua me mjaft kritika ky organizim?
Pa e ditur që do më bënit këtë pyetje, unë i jam përgjigjur kësaj më sipër por gjithsesi dua të theksoj se ajo që e bëri të kontestueshëm dhe kritikueshëm, ishte fakti se organizimi i këtij Samiti u bë keq nga Ministria e Diasporës dhe z. Majko. U përqendrua më shumë në krijimin e celulave për të ardhmen dhe nuk vlerësoi rëndësinë e këtij aktiviteti, i cili duhet organizuar e drejtuar nga vetë diaspora dhe jo qeveria shqiptare. Që në krijimin e kësaj ministrie, vizitat e ministrit apo kërkesat në afate të paparashikuara për t’ju përgjigjur letrave e kërkesave te tyre, krijuan përçarje në rradhët e shoqatave dhe dëmtuan punën e tyre vullnetare.
Titulli “Ambasador Nderi” i Missionit Diplomatik “Peace and Prosperity”, çfarë vlere ka për ju?
Për mua ky titull ishte shumë domethënës por edhe një surprizë e bukur për të cilën falenderoj drejtuesit e Misionit si dhe te gjithë ata që morën pjesë në organizimin e një ceremonie të mrekullueshme të cilën do ta ruaj përherë në kujtesën time. Ky Mision kishte sjellë çdo aktivitet dhe kontribut që une kam dhënë me artin dhe kulturën tonë brenda dhe kryesisht jashtë vendit, në Kanada, duke vlerësuar punën vullnetare me fëmijët, të cilët janë e ardhmja e çdo kombi. Falenderoj z. Ambassador-Shefki Hysa dhe zj. Lumturi Vladi për përkushtimin dhe vlerësimin dinjitoz që më bënë dhe i uroj sukses misionit. Marrja e titullit “Ambasador Nderi”, me obligon mua të punoj edhe më shumë dhe të bëhem pjesëtar i degës së kësaj shoqate këtu ne Toronto, për të vlerësuar e motivuar të tjerë misionarë paqeje për punët e nderuara që shqiptarët bëjnë.
Po tituli “Ambasador i Kombit” ?
Të dy titujt kanë një të përbashkët, vlerësim e mirënjohje për punën time vullnetare për 8 vite në shërbim të komunitetit, ruajtjes së valleve, kostumeve e traditave tona popullore si dhe transmentimi i këtyre vlerave tek brezat e lindur këtu në Kanada. Ndryshimi është që titulli jepet nga të huajt të cilët vlerësojnë në mënyrë të paanshme dhe tjetri nga vendlindja ime, Shqipëria. Ndjehem mjaft mirë pasi ky është i vetmi shpërblim i punës sime të cilës i jam dedikuar tërësisht. Gjej rastin të falenderoj z.Ermal Muça, Ambasadorin e Republikës së Shqipërisë, i cili duke qenë pranë aktiviteteve të organizuara nga shoqata këto vite, ka vlerësuar punën time maksimalisht duke propozuar dhënien e trofeut “Shqiponjë e Artë” për Sh.B.SH.K, tërësisht e merituar dhe mua personalisht titullin “Ambasador i Kombit”. Por jo vetëm mua, por aktivistëve të tjerë të mirënjohur si z. Julian Dyrmishi apo Dr. Lulëzim Rafshi etj. Familja jonë Këllezi në këtë Samit u vlerësua me dy tituj të tillë, unë në Kanada dhe kushërira ime në Danimarkë, gjë që tregon përkushtimin dhe vlerësimin e familjes, për të cilin jam vërtet krenar. Një familje patriote, me vlera të mëdha qytetare e cila ka vënë një gur në themelin e qyetit të Tiranës, që në krijimin e saj dhe që na bën të jemi kryelartë për gjakun që rrjedh në damaret tanë.
Si koreograf i sukseshëm i grupit “Shqiponjat e Vogla”, cili është statusi i grupit dhe cilat janë projektet e tuaja më të afërta?
Siç e përmenda edhe pak me parë, grupi i valleve “Shqiponjat e Vogla” është krijuar që në vitin 2011 dhe këtë vit sapo kam krijuar një grup të ri, i cili është edhe brezi i tretë i fëmijëve që me aq pasion mësojnë dhe interpretojnë vallen e bukur shqiptare. Grupi i vogël do të marrë pjesë në një aktivitet që organizohet në fund të muajit prill, në kuadrin e ditës së fëmijëve ku marrin pjesë grupe që përfaqesojnë shtete të ndryshme, dhe ky aktivitet është i pari për Shqiponjat me te vogla. Grupi qendror është ftuar të marrë pjesë në një festival shqiptar që do të zhvillohet në data 5-6 prill në Tampa te Floridës, US, për të cilin grupi ka kohe që përgatitet. Këtë rradhë do të interpretojnë një valle me motive të Librazhdit, për të cilin kemi siguruar edhe kostumet, një kuartet me motive të Shupalit ku interpretojnë dy djem të talentuar dhe dy motrat Këllezi, si dhe vallja përmbyllëse e cila është vallja e Tiranës, që përveç shqiponjave do të interpretohet nga Ikona e vallëzimit shqiptare, mbretëresha e saj znj. Liljana Cingi dhe bashkë me të, edhe unë në finalen e valles duke realizuar një ëndërr të kahershme për të interpretuar me miken time një valle se bashku. Faleminderit Liliana Cingi.
Ju falenderoj edhe Juve gjithashtu, për vëmendjen dhe pasqyrimin e realitetit nëpërmjet shkrimeve tuaja, jo vetëm në këtë rast por gjithmonë për çdo aktivitet. Faleminderit e suksese!
