![](https://ampress.ca/wp-content/uploads/2021/01/auto_Lahuta-695x3101608802312-1.jpg)
Iniciuar nga Qendra për Zhvillimin e Kulturës Tradicionale “Shkabat” në Prishtinë është hapur shkolla për mësimin e lahutës “Lahutarët e rinj të trojeve etnike”.
Qëllimi i kësaj shkolle është të ofrojë ligjërata dhe orën për mësimin për interpretim me lahutë.
Përveç kësaj, kjo shkollë do të ofrojë informacione lidhur me historikun e lahutës dhe interpretimit të këngëve me këtë instrument.
Sokol Plakolli, drejtor i QZHKT “Shkabat” ka thënë për Kallxo.com se qëllimi i hapjes së kësaj shkolle është ripërtëritja e lahutarëve shqiptarë dhe nxjerrja e gjeneratave të reja të lahutarëve.
“Qëllim tjetër parësor është institucionalizimi i veglës sonë të lashtë, jo të mësohet nëpër oda, por të mësohet me planprogram nga studiuesit dhe interpretuesit- lahutarët e njohur, si: Zymer Neziri, Isa Elezi, Gani Nikqi e Hysen Kurtaj”, ka thënë Plakolli.
Sipas tij, shkolla do të ofrojë kurse për të gjitha mosha, me një planprogram adekuat sipas kërkesave dhe nevojave dhe moshës së aplikuesve.
“Por, në gjenezë qëllimi i shkollës së lahutës është që zbulojmë dhe të përkrahim të interesuarit me qëllim që të rilindim lahutën si një instrument, i cili po shkon drejt shuarjes”, ka thënë ai.