By Flamingot e protestës mirëpresin vizitorët në “Sunny Hill”, Dua Lipa jep një tjetër sinjal mbështetjeje për kauzën mjedisore
PRISHTINË – Këngëtarja shqiptare me famë ndërkombëtare, Dua Lipa, çel sot edicionin e këtij viti të festivalit “Sunny Hill”, i cili do të zhvillohet në Prishtinë nga 31 korriku deri më 2 gusht, duke mbledhur mijëra pjesëmarrës dhe artistë nga e gjithë bota.
Ajo që bie menjëherë në sy në hyrje të festivalit është vendosja e flamingove, simboli që është identifikuar me protestat qytetare për mbrojtjen e natyrës, të cilat nisën në Zvërnec dhe më pas u shndërruan në një lëvizje të gjerë mbarëkombëtare kundër politikave qeveritare.
Ky detaj merr një domethënie të veçantë, pasi festivali zhvillohet në një periudhë kur Shqipëria vijon të përjetojë protesta masive, të cilat fillimisht nisën si një kauzë për mbrojtjen e mjedisit dhe zonave të mbrojtura.
Më herët, babai i artistes, Dukagjin Lipa, kishte shprehur publikisht mbështetjen e tij për protestuesit gjatë një bashkëbisedimi në podkastin e shkrimtares Lea Ypi. Deklaratat e tij u pasqyruan gjerësisht edhe në mediat ndërkombëtare, duke tërhequr vëmendjen ndaj zhvillimeve në Shqipëri.
Vendosja e flamingove në hyrje të “Sunny Hill” shihet nga shumëkush si një tjetër shenjë solidariteti me këtë kauzë. Duke qenë se festivali tërheq çdo vit një audiencë gjithnjë e më të madhe ndërkombëtare dhe emra të njohur të muzikës botërore, simboli i protestës fiton një tjetër skenë të rëndësishme dhe një jehonë më të gjerë përtej kufijve shqiptarë.
