By Në flotën më të rëndësishme të botës, një shqiptari i është besuar një detyrë e rëndësishme nga 27 qershori 2025, Alban Dervishi është zyrtarisht komandant i luftëanijes anfibe amerikane USS Pearl Harbor në qershor të këtij viti.
Në ceremoninë e marrjes së detyrës në San Diego të Kalifornisë, komandantin Alban Dervishi e nderuan miq, kolegë dhe familjarë të shumtë. Marina ushtarake amerikane ka një traditë – yllin në anën e djathtë të gjoksit, që simbolizon emërimin si komandant i anijës për Harbor, duhet ta vendosë Rudina, bashkëshortja e Albanit.
Sepse Rudina është qenia njerëzore që do të vuaj më tepër largësinë dhe ndarjen me periudha të gjata nga bashkëshorti apo qoftë edhe rrezikun që mund të krijojnë misionet e vështira.
Ndërsa për Albanin, vendosja e yllit në xhaketë është shpërblim i një jete në marinën ushtarake amerikane si dhe përgjegjësinë e madhe.
“Marrja e një detyre të tillë është obligim ndaj vendit dhe përgjegjësi e qindra marinarëve”.
Karriera e Dervishit në Marinën Ushtarake amerikane, nisi çysh në moshën 18-vjeçare dhe pothuajse menjëherë pas emigrimit në SHBA me familje.
Përzgjedhja kishte qenë e lehtë, pasi Albani ishte rritur në një familje ushtarakësh, madje ushtarak nuk ishte vetëm i ati por edhe gjyshi. I dashuruar me profesionin, Albani i ngjiti një pas një shkallët e hierarkisë ushtarake derisa një ditë arriti të marr timonin e një prej anijeve të marinës amerikane, Pearl Harbor. Kjo anije luftarake është përfshirë në konflikte të rëndësishme anë e mbanë globit, për më tepër, vitet e fundit bota është trazuar nga vatra luftimesh të rrezikshme.
Anija zbarkuese si pjesë e flotës së shtatë amerikane ka një histori të admirueshme shërbimi të nisur që nga viti 1998 me 300-500 marinarët e afërt, të dërgoj deri në 500 trupa në zona stërvitjesh apo luftimesh. Ajo mund të transportoj kryesisht deri në 10 mjete anfibe apo tanke “Abrams”.
Në historikun e saj anija është përdorur pa dallim edhe në misione humanitare edhe në misione luftarake. Në vitin 2010, anija u angazhua kundër piratërisë në afërsi të brigjeve të Somalisë, ndërsa afër vitit 2014 ajo iu bashkua një task force shumë kombëshe të udhëhequr nga Kombet e Bashkuara në luftën kundër ISIS-it në Siri.
Pearl Harbor u përdor poashtu për tërheqjen e trupave amerikane nga Afganistani në vitin 2020-2021. Anija u pagëzua me emrin Pearl Harbor në shkurt të vitit 1996 në New Orleans, Lusiana, në nderim të marinarëve amerikanë të vrarë gjatë sulmit të pabesë të ushtrisë së perandorisë japoneze, 1941 në ishujt Hawai, një historinë e dhimbshme për amerikanët.
Çuditërisht kjo histori e bujshme e Luftës së Dytë Botërore ka lidhur Albanin me anijen. Një lidhje, të cilën ai e kishte treguar në intervistën para disa kohësh në Opinion me Blendi Fevziun.
“Procesi për t’u kualifikuar fillon shumë herët, teksa para 3-4 vitesh u zgjodha për komandë, janë edhe një seri procesesh për të parë se ku duhej të caktohesha. Dhe unë mendoja një anije me një emër, që kur t’ja them një shqiptari dhe të thotë ‘e mbaj mend Pearl Harbor’. Unë pata fatin e zgjedhjes”, tha ai gjatë kësaj interviste.
Lajmi për rolin e Albanit u bë i ditur edhe nga Ambasada e Shteteve të Bashkuara në Tiranë.
“Një ‘Tirons’ që merr komandën e një luftëanijeje amerikane! Njihuni me Komandant Alban Dervishin, shqiptaro-amerikani, i cili ka marrë komandën e USS Pearl Harbor në qershor të 2025-ës. I lindur në Tiranë dhe me origjinë nga një familje ushtarake, Albani dhe prindërit e tij emigruan në Shtetet e Bashkuara 25 vjet më parë për të ndjekur ëndrrën amerikane”, njofton ambasada.
Komandant Alban Dervishi, gradë e Marinës ushtarake që barazohet me atë të nënkolonelit në forcat tokësore, me emërimin në komandën e USS Pearl Harbor, ka arritur një nivel karriere, të cilën më parë nuk e ka pasur asnjë ushtarak tjetër me origjinë shqiptare.
Një mundësi e dhënë nga Amerika për një emigrant!
