By Toronto- Ontario
Një mbrëmje magjike në Toronto solli një përzierje të veçantë të tingujve shqiptarë dhe muzikës festive. Programi “Holiday Concert” prezantoi një përvojë muzikore unike, interpretuar me dashuri dhe pasion nga një orkester e talentuar kanadeze.
Ashtu siç kishte lajmëruar, ditën e diel u mbajt në Teatrin Isabel Bader në Toronto, koncerti simfonik “Holiday Concert”, dedikuar komunitetin shqiptar në Ontario.
Nën performancën e Orkestrës Filharmonike të Greater Toronto dhe nën drejtimin ekskluziv të dirigjentit shqiptaro-kanadez Bujar Llapaj, programi artistik përfshinte muzikë argëtuese si valse, overtura dhe aria gjithashtu dhe pjesë të kompozitorëve shqiptar.
Me një organizim të shkëlqyer nga drejtori Ekzekutiv i Greater Toronto Philharmonic Orchestra Qazim Kallushi dhe në bashkëpunim me Albanian Canadian Excellence (ACE), artdashësit shqiptarë patën mundësinë të ndiqnin nga afër galanë artistike me vepra të përzgjedhura nga klasikët botërorë Brahms, Verdi, Pucini, Shtraus, Offenbach, Mascagni.
Ekskluzive për publikun ishte performimi për herë të parë me partitura origjinale të dy veprave nga autorë shqiptarë si “Valle Epike” e Fehim Ibrahimit dhe “Malësorja” e Lorenc Antonit.
“Holiday Concert”, bëri bashkë komunitetin shqiptar për të shijuar muzikë nga një orkestër kanadeze, duke përcjellë magjinë e festave në një përformancë të paharruar. Eventi shërbeu si një mundësi takimi mes shqiptarësh në një ambjent prestigjoz në qendër të Torontos.
@Ampress
