Manitoba/ Kozeta Miliku: Jeta mes karrierës akademike dhe nismës për të krijuar një bashkësi kuqezi

Manitoba/ Kozeta Miliku: Jeta mes karrierës akademike dhe nismës për të krijuar një bashkësi kuqezi

Manitoba – Kanada

Është e sigurtë se kur flasim për femrat, historitë e tyre nisin nga shpirti. Doktoresha e ardhur nga Shqipëria, ka vendosur që Betimin e Hipokratit ta njohë edhe në Kanada. Manitoba është një nga provincat e Kanadasë ku pothuaj zhurmat shqiptare nuk jane ndjerë aq shumë. Por duket se ujërat ka filluar t’i trazojë Kozeta Miliku.
Kozeta ka përfunduar studimet në Universitetin e Mjekësisë në Tiranë, doktoraturën në “Erasmus University Medical Centre” të Hollandës dhe tashmë ajo është duke kryer postdoktoraturën në “Children’s Hospital Research Institute of Manitoba”, në Winnipeg të Kanadasë.
Prej pothuaj një vit e gjysmë, së bashku me bashkëshortin Enrin, ata janë shpërngulur në Kanada. Prej ardhjes së tyre, ata kanë ndjerë nevojën e një komuniteti shqipfolës për të cilën dëshira për komunikim ka qenë dypalëshe. Duke kryer kërkimet e nevojshme, Miliku vuri re se nuk ka ende në Winnipeg një komunitet shqiptar aktiv. Duke u udhëhequr nga dëshira të shpirtit, edhe pse në provincën ku dëbora shtrohet më gjatë se kudo në Kanada, pa harruar edhe ngarkesën e jetës së saj të suksesshme akademike, Kozeta së bashku me ndihmën e disa shqiptarve të tjerë, nuk ndaloi pa mbledhur shqiptarët e Manitobës siç ia donte zemra. Dhe ashtu u bë. Vullneti i saj i hekurt i bashkoi më 1 dhjetor 2018, shqiptarët e Manitobës për të festuar festën e flamurit shqiptar.
Kozeta kujton se ajo mbrëmje i ka lënë mbresa dhe kujtimet të bukura. Ajo shprehet se pjesëmarrja ishte e gëzueshme kur numëruan rreth 200 shqiptarë që iu bashkuan festës. Prej atij aktiviteti Kozeta Miliku, është e vendosur të formojë Bashkësinë Shqiptare të Manitobës.
Për Albanian Montreal Press, Miliku tregon se ajo u ka parashtruar atyre një projekt me disa pika të përbashkëta për të gjithë shqiptarët e të gjitha krahinave. Sipas saj, projekti për komunitetin shqiptar do të ngrihet në tri pika:
• Krijimi i një komuniteti shqiptar që do të shërbejë si një urë solide lidhjeje midis dy vendeve (Shqipërisë dhe Kanadasë) dhe do të ruajë identitetit kombëtar
• Formimin e shkollës shqipe dhe mësimin e gjuhës shqipe
• Prezantimin e Shqipërisë në aktivitete kulturore të ndryshme (Folklorama). Në këto kushte është ngritur një grup pune vullnetar. Së shpejti do të njihemi edhe me emërimet për anetarët e bordit nga gjithë komuniteti.
Por Miliku nuk ka qenë e vetme në të gjithë këtë inciativë. Ajo u është mjaft mirënjohëse të tjerë drejtues shoqatash të cilët e kanë këshilluar nga eksperienca e tyre për të bërë hapa të sigurtë. Për të, Ilir KuqiRuki Kondaj apo edhe vetë Ambasadori shqiptar në Ottawa, Ermal Muça, kanë qenë një mbështetje për formimin e shoqatës së shqiptarëve në Manitoba.
“Dëshira dhe synimi im është që brenda këtij viti, ne të kemi formuar dhe regjistruar shoqatën e Shqiptarëve në Manitoba (Albanian Community of Manitoba), te kemi filluar klasat e gjuhës Shqipe, të jemi rregjistruar në Folklorama dhe siguruar fonde për mbarëvajtjen e kësaj shoqate” – shprehet Kozeta.

administrator

Related Articles