By I dashur babi,
Sa herë mendoj për ty, më vjen ndër mend një jetë e jetuar me pasion, dashuri dhe art, një jetë që ka ndriçuar rrugën time që nga dita e parë.Dikush që ka ndërtuar jetën me pasion, dashuri dhe art, dikush që ka ditur të bëjë çdo ditë të bukur edhe për të tjerët. Ti nuk ke qenë kurrë vetëm një prind; ti ke qenë gjithmonë udhërrëfyesi im, shembulli im, frymëzimi im. Në sytë e mi, çdo vit i jetuar prej teje është një triumf, dhe sot, duke festuar 75 vitet e tua, unë ndjej krenari të pafund që jam vajza jote.
Një prej ditëve më të bukura dhe më të shënuara të marsit është edhe ditëlindja jote. Sot viteve të tua u shtohet një numër, 75. Por kjo është vetëm një shifër, sepse mosha kurrë nuk të ka penguar të mbetesh i ri në shpirt, në energji dhe në dashurinë për jetën.
Babi, ti ke qenë gjithçka në jetën tënde. Nëse çdo njeri ka një talent të lindur, i yti ka qenë të jesh njeri. Ti je pjesë e jetës së çdo familjari, e çdo shoku, e të gjitha mbesave të tua; je bashkëudhëtar në jetën time. Unë e di sa të shenjta i ke miqësinë, komunikimin, shoqërinë, muzikën dhe artin tënd. Në çdo punë tënden kam parë dashurinë për të bërë gjëra të mira, dhe në gjithçka që ke krijuar ke lënë gjurmë pasioni, përkushtimi dhe jete.
Arti yt nuk ka qenë kurrë vetëm skenë apo këngë; ai ka qenë gjithmonë një urë mes teje dhe njerëzve. Përmes artit tënd ti nuk ke qenë vetëm një artist, por një njeri mes njerëzve, që i ka dëgjuar, i ka kuptuar dhe i ka kënduar jetës së tyre. Në çdo notë, në çdo varg dhe në çdo krijim tëndin, mbetet një pjesë e shpirtit tënd. Kujtimet e njerëzve me ty janë kaq të shumta, sepse arti yt ka qenë gjithmonë jetë, dashuri dhe dritë.
Dashuria për muzikën, jetën, artin dhe të bukurën të ka motivuar që e gjithë jeta jote t’i përngjajë një feste që nuk mbaron. Besimi yt se vullneti i hekurt është çelësi i suksesit ka bërë që ti të arrish shumë dhe të rreshtosh disa trofe, që kanë qenë krenari jo vetëm për ty, por edhe për ne dhe për shumë të tjerë.
Ne kemi dashur gjithmonë që ditë si kjo të jenë festë, dashuri dhe familje. Unë jam rritur duke të parë ty, duke më mësuar, udhëhequr dhe besuar tek unë. Çdo këshillë, çdo buzëqeshje, çdo gjest yt më ka bërë më të fortë dhe më të dashur për jetën.
Ba, muzika dhe kënga kanë qenë një refren i përhershëm i jetës tënde, por ato nuk të kanë mjaftuar. Që në fëmijërinë tonë na ke mësuar se çdo portë suksesi dhe integriteti në jetë hapet me vullnet, pasion dhe dëshirë për të bërë mirë.
Sot, edhe pse je tërhequr nga ritmi i përditshëm i aktiviteteve dhe i skenës, arti yt nuk është ndalur kurrë. Ti nuk je larguar nga arti, babi, thjesht e ke zhvendosur atë nga skena në mendim dhe nga kënga në libra. Aty ku dikur ishte skena dhe tingulli i muzikës, sot janë faqet e librave të tu studimorë, ku vazhdon të shkruash, të reflektosh dhe të lësh një tjetër gjurmë të rëndësishme për kulturën dhe artin tonë.
Tani e kuptoj edhe më shumë sa shumë dashuri ke dhënë. Për ty familja nuk lihet kurrë vetëm, as miqtë. Edhe për kolegët e tu ti ke qenë gjithmonë aty. Ti e ke dashur njeriun, ba — e ke vlerësuar, i ke krijuar, i ke kënduar dhe i ke shkruar njeriut.
Gjithmonë jam emocionuar kur të tjerët përmendin emrin tënd dhe kur fillojnë të tregojnë kujtimet e tyre me ty. Sa shumë janë ato… dhe sa shumë dashuri mbajnë brenda. Ti i di disa sekrete të bukura të jetës, babush. Ke ditur të gjesh ekuilibra lumturie, të krijosh balancë mes karrierës dhe familjes, të gjesh kohë për të na afruar me folklorin, muzikën, instrumentin dhe me dashurinë për të bukurën.
I dashur babi im, të shkruash për ty do të thotë të përpiqesh të përshkruash një jetë të mbushur me festë, art dhe dashuri. Dhe sot, duke të parë ty me 75 vite, më duket sikur çdo ditë që ke jetuar ka qenë një melodi e përjetshme, një libër i hapur ku çdo kapitull lë një dritë të pashuar te ne.
Nëse një ditë do të arrij të të përngjaj sadopak, do të jem krenare të them se nga kush kam ngjar. Ti je shembulli i dashurisë për artin, jetën dhe njerëzit – dhe kjo është trashëgimia më e bukur që mund të kem.
Me shumë mall dhe dashuri,
Gëzuar 75-vjetorin, babi!
E jotja gjithmonë,
Blerina
