By Nga Shani Pnishi
Ujëvara shumë e njohur dhe e veçantë në mbarë botën, Niagara Falls në Kanada, ditën e djeshme u ndriçua me ngjyrat e Flamurit të Kosovës, bardh, kaltër dhe verdhë për të nderuar 17 shkurtin, Ditës së Pavarësisë së Kosovës.
“Kosova është tejet mirënjohëse për mbështetjen dhe bashkëpunimin e vazhdueshëm me autoritetet Kanadeze. Kjo dëshmohet edhe sot me këtë veprim dhe simbolikë mbështetëse”, -shprehet ambasadori i Kosovës në Kanada, z.Adriatik Kryeziu. I pranishëm në aktivitet ishte edhe Donat Syla, Konsulli i Përgjithshëm i Republikës së Kosovës në Toronto, i cili theksoi se: “Ujëvara e Niagarës sonte u stolis me ngjyrat e flamurit të Republikës së Kosovës! Qoftë e përjetshme qenësia e kombit tonë, sikurse rrjedha e ujit të kësaj mrekullie natyrore që u zbukurua edhe më shumë në këtë ditë festive për të gjithë ne!”
Kjo është hera e parë që ngjyrat e flamurit të Kosovës shfaqen në rrjedhën e Ujëvarës së Niagarës që prej shpallejes së Pavarësisë së Kosovës më 17 shkurt 2008. Edhe ambasadori shqiptar në Kanada z. Ermal Muça ka uruar qytetarët e Kosovës nga Niagara: “Gëzuar Pavarësinë e Kosovës, këtë ditë të shënuar dhe me rëndësi të veçantë historike për mbarë kombin shqiptar! Nderim për të rënët që dhanë jetën për liri dhe për të gjithë ata që sakrifikuan për Pavarësinë e Kosovës! Të angazhuar të çojmë edhe më përpara bashkëpunimin e ngushtë dhe vëllazërore ndërmjet dy misioneve, për fuqizimin e mëtejshëm të marrëdhënieve me Kanadanë e në përputhje edhe me pritshmëritë dhe vullnetin e diasporës shqiptare në Kanada!”
