By Shoqata Kulturore Shqiptare në Montreal po shënon 10 vjet veprimtarie të pandërprerë në shërbim të komunitetit shqiptar në Quebec. Kjo dekadë ka qenë e mbushur me aktivitete kulturore, edukative dhe sociale, të cilat kanë forcuar identitetin shqiptar në diasporë dhe kanë krijuar ura të qëndrueshme bashkëpunimi mes brezave të ndryshëm të komunitetit.
E themeluar në vitin 2015, Shoqata ka konsoliduar pozicionin e saj si një prej institucioneve më të rëndësishme të komunitetit shqiptar në Montreal, duke mbajtur gjallë traditat kulturore dhe duke nxitur pjesëmarrjen aktive në jetën shoqërore e komunitare.
Promovimi i kulturës dhe traditave shqiptare
Gjatë këtyre dhjetë viteve, Shoqata ka organizuar dhjetëra aktivitete kulturore që kanë përfshirë fëmijë, të rinj dhe familje të të gjitha moshave. Ndër ngjarjet më të rëndësishme, të cilat tashmë kanë marrë karakter tradicional, përmenden:
- Festa e Flamurit, e shoqëruar çdo vit me aktivitete kulturore, koncerte, valle e këngë, tubime komunitare dhe, së fundmi, Parada Vjetore e Makinave, një iniciativë novatore që ka tërhequr pjesëmarrje të gjerë dhe e ka shndërruar Ditën e Flamurit në një festë të madhe të bashkimit dhe identitetit shqiptar.
- Ceremonia e Shtatorit pranë bustit të Shën Terezës në Lasalle, një aktivitet i përvitshëm që nderon vlerat humaniste dhe rrënjët shqiptare të Shenjtores, duke mbledhur dhejtra pjesëmarrës çdo vit.
Shoqata ka zhvilluar gjithashtu aktivitete letrare e artistike, si mbrëmje poetike, promovime librash dhe takime me autorë shqiptarë që veprojnë në Kanada dhe më gjerë.
Bashkëpunim me “Albanian Montreal Press” dhe promovimi i librit “Apostulli – Fan Noli”
Në kuadër të forcimit të bashkëpunimit me median dhe platformën informative të komunitetit, Shoqata ka bashkëpunuar ngushtë me Albanian Montreal Press, një prej burimeve kryesore të informacionit për shqiptarët në Quebec.
Falë këtij bashkëpunimi u realizua promovimi i librit “Apostulli – Fan Noli” të gazetarit të njohur të Zërit të Amerikës, Ilir Ikonomi, një figurë ikonike e gazetarisë shqiptare. Ky promovim krijoi një hapësirë të vlefshme diskutimi mbi figurën e Nolit, rolin e tij historik dhe rëndësinë e studimeve bashkëkohore mbi personalitetet e shquara shqiptare. Ngjarja u prit me interes të madh nga lexuesit dhe dashamirësit e historisë, kulturës dhe gjuhës shqipe.
Festivali i Librit Shqip në Montreal – një kapitull i ri suksesi
Një ndër ngjarjet më të spikatura të kësaj periudhe ishte organizimi, për herë të parë, i Festivalit të Librit Shqip në Montreal, një hap historik për kulturën shqiptare në diasporë. Ky festival u zhvillua në bashkëpunim me Shoqatën Shqiptare Kosova-Montréal dhe Albanian Canadian Development Alternative (ACDA), duke sjellë së bashku autorë, poetë, lexues, pedagogë dhe dashamirës të librit shqip.
Festivali u vlerësua gjerësisht si një sukses i prekshëm që i dha komunitetit një hapësirë të re kulturore, ku u prezantuan libra të rinj, u mbajtën lexime poetike dhe u zhvilluan diskutime me vlerë mbi gjuhën dhe letërsinë shqipe. Ky event shënoi traditën e parë të qëndrueshme të librit shqip në Montreal dhe pritet të zgjerohet edhe më tej në vitet që vijnë.
Edukimi në qendër: Shkolla Shqipe “Naim Frashëri”
Një shtyllë themelore e Shoqatës mbetet edukimi. Shkolla Shqipe “Naim Frashëri”, e mbështetur dhe organizuar nga Shoqata, u jep fëmijëve të komunitetit mundësinë të mësojnë gjuhën, traditat dhe historinë shqiptare në mënyrë të strukturuar dhe profesionale. Ky projekt është ndër arritjet më të rëndësishme dhe më jetëgjata të komunitetit shqiptar në Montreal.
Grupi i valleve “Albos” – ruajtje dhe përcjellje e traditës shqiptare
Një tjetër arritje domethënëse në këto 10 vite është krijimi i grupit shqiptar të valleve “Albos”, i cili lindi nga dëshira e disa prindërve për t’i afruar fëmijët me folklorin shqiptar. Nën drejtimin e Shoqatës Kulturore Shqiptare në Montreal dhe me përkushtimin e Anës Hasa, “Albos” u shndërrua në një grup të mirëstrukturuar artistik që interpreton valle nga krahina të ndryshme të Shqipërisë.
Me kostume të përgatitura me kujdes dhe koreografi të përshtatura për breza të ndryshëm, grupi “Albos” është bërë pjesë e pandashme e aktiviteteve komunitare: merr pjesë në festime, evente kulturore, aktivitete të shkollës shqipe, madje edhe në dasma e gëzime familjare të komunitetit. Performancat e tyre mbeten një simbol i gjallë i traditës sonë dhe një mënyrë e bukur për të edukuar brezin e ri me vlerat e kulturës shqiptare.
Grupi i valleve ALBOS
Nëntori i Flamurit, një Moment Krenarie për Shqiptarët në Montreal
Si çdo vit, edhe këtë nëntor, Festa e Flamurit do të mbledhë shqiptarët në një festë madhështore që tashmë është kthyer në një traditë të dashur dhe të pandashme të komunitetit. Ky aktivitet, i cili bashkon familje, të rinj dhe të moshuar nga i gjithë Montreal-i, është bërë një moment i veçantë reflektimi për historinë, identitetin dhe rrënjët tona. Në një atmosferë festive, ku gërshetohen muzika, vallet, kultura dhe simbolika kombëtare, komuniteti shqiptar jo vetëm feston Ditën e Pavarësisë dhe të Flamurit, por riafirmon edhe vlerat e unitetit, krenarisë dhe përkatësisë. Kjo ngjarje, e organizuar me përkushtim çdo vit nga Shoqata Kulturore Shqiptare në Montreal, vazhdon të rritet e të pasurohet, duke u kthyer në një prej momenteve më të rëndësishme të jetës komunitare shqiptare në Quebec.
Angazhim komunitar dhe thirrje për bashkëpunim me bizneset shqiptare
Shoqata Kulturore Shqiptare në Montreal ka shërbyer si qendër bashkimi për komunitetin, duke organizuar:
- Piknikun vjetor familjar me aktivitete sportive dhe argëtuese
- Takime informuese dhe ndërgjegjësuese për familjet shqiptare
- Projekte të përbashkëta me organizata shqiptare në Kanada
- Bashkëpunime institucionale në fushën e kulturës dhe edukimit
Në kuadër të zgjerimit të veprimtarisë dhe fuqizimit të komunitetit, Shoqata fton të gjitha bizneset shqiptare në Montreal dhe Quebec të bashkëpunojnë dhe të mbështesin aktivitetet kulturore e komunitare. Mbështetja e biznesit shqiptar është thelbësore për ruajtjen e identitetit, forcimin e komunitetit dhe zhvillimin e projekteve të reja në të ardhmen. Shoqata Kulturore Shqiptare në Montreal mbetet e përkushtuar t’i shërbejë komunitetit me përkushtim, transparencë dhe vizion, duke ndërtuar ura të reja bashkëpunimi për brezat që vijnë.
Nga Blerina Ruka/ Albanian Monteal Press
