Kanada përshkallëzon masat, qeveria detyron udhëtarët të qëndrojnë në hotele për karantinë

Ottava– Kanadaja po rrit masat për këdo që vjen nga jashtë vendit, ndërkohë që shqetësimet shtohen për variantet e COVID-19 anembanë globit.
Në deklaratën e tij ditën e premte, Kryeministri Justin Trudeau tha se të gjithë udhëtarët që mbërrijnë në Kanada do të duhet të marrin një test PCR COVID-19 pas mbërritjes.
Ndërsa udhëtarët presin rezultatet e tyre, ata do të duhet të bëjnë karantinë në hotelet e caktuara nga qeveria për tre ditë me shpenzimet e tyre. Kjo pritet të kushtojë më shumë se 2,000 dollarë, u shpreh kryeministri.

Të gjithë ata që do të rezultojnë negativë do të lejohen të kthehen në shtëpi për të përfunduar izolimin e tyre dy-javor, ndërsa ata që do të rezultojnë pozitivë për virusin do të duhet të bëjnë karantinë në mjediset e caktuara të qeverisë.
Ndërkohë, linjat ajrore kryesore kanadeze po anulojnë fluturimet drejt destinacioneve të ngrohta përpara pushimit të pranverës e deri më 30 prill.
Duke filluar prej javës së ardhshme, të gjitha fluturimet ndërkombëtare do të lejohen të ulen vetëm në katër aeroporte; në Vancouver, Toronto, Montreal dhe Calgary.