By Një ceremoni madhështore gala e organizuar nga RH Scholarship në Toronto mblodhi një komunitet të tërë për të festuar dhe mbështetur arritjet akademike të studentëve shqiptarë. Në këtë mbrëmje unike, plot stil dhe elegancë, RH Scholarship ndau 14 bursa studimi për studentët ekselentë shqiptarë që po ndjekin ëndrrat e tyre akademike dhe profesionale.
Me një atmosferë të ngrohtë dhe festive të kuruar në detaj, mbrëmja u moderua me finese nga Tea Haxhillari, ndërsa për praninë speciale nga Shqipëria ishte gazetari dhe prezantuesi i mirënjohur, Eno Popi. Një surprizë e veçantë për të ftuarit ishte këngëtarja ikonë e muzikës shqiptare, Irma Libohova, e cila magjepsi të pranishmit me energjinë dhe zërin e saj, duke sjellë gjallëri dhe emocion në këtë event.
RH Scholarship theksoi dhe vlerësoi emra me kontribute të çmuara në komunitetin shqiptar nga fusha të ndryshme, duke nderuar individë të tillë si Arben Kallamata, Robert Simoni, Ana Golja, Ramazan Kellezi, Shani Pnishi, Ismet Mirena, Xhemi Agaj, Alban Merepeza, Qazim Kullolli, Kris Todi, Përparim Kapllani dhe të tjerë, të cilët u shpallën fitues të Çmimit të Lidershipit në Komunitet. Këta liderë frymëzues kanë shkuar përtej detyrës për të sjellë ndryshim pozitiv, duke pasur një ndikim të fuqishëm dhe duke forcuar komunitetin tonë përmes përkushtimit, dhembshurisë dhe vizionit të tyre.
Secili prej tyre ka treguar një angazhim të jashtëzakonshëm për të promovuar unitetin, për të ndihmuar të tjerët dhe për të krijuar një ndikim të qëndrueshëm. Lidershipi i tyre është një shembull i shkëlqyer për të gjithë ne, dhe ne jemi thellësisht mirënjohës për pasionin që ata sjellin në përmirësimin e komunitetit tonë çdo ditë.
Evente të tilla, me një theks të veçantë mbi komunitetin shqiptar dhe promovimin e vlerave të tij, janë një tipar dallues i RH Scholarship dhe ekipit të Haxhillari Team, të cilët me profesionalizëm dhe përkushtim të palodhur vazhdojnë të mbështesin rininë shqiptare, duke ndihmuar në ruajtjen dhe përhapjen e kulturës dhe traditave tona të çmuara.
Nga Blerina Ruka/ AMPRESS
