By Nga Shani Pnishi
Konsulli i Republikës së Kosovës në Toronto z. Donat Syla ka përkujtuar patriotin Hysen Prishtina së bashku me pasardhësit e familjes së tij në Kanada.
“Sonte isha i ftuar te familja Prishtina në Toronto, ndër familjet më të vjetra nga Kosova që janë vendosur në Kanada”- shkruan ai në faqen e tij në Facebook. Në njoftimin e konsullatës për këtë ngjarje thuhet: “Familja Prishtina është pasardhëse e patriotit Hysen Prishtina, që ishte prefekt i Prishtinës, njëherit më meritori për hapjen e liceut në Prishtinë ku sot është gjimnazi “Sami Frashëri”. Gjatë peridhës së viteve 1941- 1944, Prefekturën e Prishtinës e drejtoi Hysen Prishtina, që ishte prefekti i parë shqiptar i saj. Në nëntor të vitit 1944 kur komunistët rrethuan Prishtinën, Hysen Prishtina me familje largohen nga Kosova në fillim migroi në Turqi ku jetuan disa vjet dhe më vonë migroi në Toronto të Kanadasë. Dihet se Hysen Prishtina gjatë kohës sa qeveriste me kryeqytetin e Kosovës vendosi si standard që çdo institucion dhe dyqan në Prishtinë duhet te vendos flamurin kombëtar për 28 nëntor.
Konsullata rikujton se në kohën e përndjekjes së hebrenjëve, ai i mori në mbrojtje të gjithë hebrenjtë e Prishtinës. Edhe pas largimit nga Kosova, në vazhdimësi kontribuoi për avansimin e çështjes shqiptare. Ai ishte ideatori dhe kontribuesi kryesor për ngritjen e monumentit të Skënderbeut në Bruksel. “Rrëfimet e padëgjuara për të atin, nga i biri tashmë i thinjur Fatosi, ishin rrëqethëse sa për dramën e tyre familjare, po ashtu edhe me historinë shqiptare të asaj kohe me të cilën patrioti Hysen Prishtina ishte i lidhur ngushtë. Sot trupi i tij prehet i qetë në Toronto, ndërkohë pasardhesit e familjes Prishtina jane krenari e diasporës sonë në Kanada, duke qene sipermarrës të suksesshëm dhe të respektuar në metropolin kanadez – Toronto”- thuhet në njoftimin e konsullatës. Me këtë rast z. Syla në emër të misionit diplomatik të Kosovës ndau mirënjohje pas vdekjes patriotit Hysen Prishtina, të cilën e pranuan djemte e tij Fisnik e Fatos Prishtina, si dhe nipi Afrim Prishtina. “Këta burra te thinjur, i pari u largua si foshnje nga Kosova ndërkaq i dyti u lind në Itali, ndërkaq Afrimi është një ndër showmen’et më të njohur në Toronto. Megjithatë atdhedashuria e kultivuar nga i ati/gjyshi i tyre vazhdon të përcillet ndër breza të kësaj familjeje që me fanatizëm ruan origjinën e saj shqiptare”- thuhet në njoftimin e konsullatës. Familja Prishtina në Toronto gëzon respekt tek komuniteti shqiptar këtu.
