By Më 16 mars 2024, nga ora 14:00 deri në 17:00, në Vancouver organizohet eventi: Albanians Professionals Network në 525 Wheelhouse Square, Vancouver, BC V5Z 4L8. Ky event ofron një mundësi të veçantë për shqiptarët e suksesshëm për t’u takuar dhe njohur me njëri-tjetrin. Eventi synon të mbledhë bashkë profesionistë, studentë, sipërmarrës dhe anëtarë të komunitetit. Hyrja është falas, por një konfirmim paraprak është i detyrueshëm për shkak të vendeve të kufizuara. Linku ku mund të regjistroheni është: https://ubc.ca1.qualtrics.com/jfe/form/SV_0pIA4aefnEJh2Iu
Vancouver- KANADA
Mos e humbisni këtë përvojë të pasur; shënoni këtë datë në kalendarin tuaj dhe bashkohuni në një festë të suksesit dhe kulturës së përbashkët!
Në një intervistë për Albanian Montreal Press, organizatori i eventit Amarildo Ceka shpreh konsideratën ndaj eventeve me përmbajtje komunitare, perspektivës për të ndarë eksperienca profesionale si dhe gjurmës për të bashkuar komunitetin e një province përmes ngjarjeve takimi me profesionistë.
Cili është roli aktual dhe kontributi juaj në komunitetin shqiptar në British Columbia?
Të them të drejtën, unë nuk besoj shumë në pozita apo hierarki, sidomos kur bëhet fjalë për angazhimin me komunitetetin. Më pëlqen ta njoh komunitetin dhe ku është e mundur, të ndihmoj njësoj si në të kaluarën ku disa njerëz të tjerë më kanë ndihmuar mua. Kontributi im, nëpërmjet projekteve të ndryshme synon të krijojë një mjedis pozitiv dhe frymëzues për komunitetin shqipfolës, në British Columbia.
Çfarë ju ka motivuar të angazhoheni në krijimin e një eventi të rrjetit për profesionistët shqiptarë në këtë provincë?
Motivimi për t’u angazhuar në krijimin e një eventi të rrjetit për profesionistët shqiptarë në provincën e British Columbia të Albertas vjen nga dëshira për të sjellë shqiptarët në një platformë të përbashkët, ku ata të mund të ndajnë eksperiencat dhe të krijojnë njohje ndërmjet tyre. Pasi e kam biseduar me disa miq të mij të afërt, kemi vënë re nevojën për evente të tilla, përtej atyre kulturore.
Cilat janë synimet tuaja me këtë event dhe çfarë shpresoni të arrini nga kjo nismë?
Synimi i këtij eventi është të krijojë një hapësirë ku profesionistët shqiptarë të mund të lidhen dhe të ndajnë ide për zhvillimin e tyre profesional. Kam vënë re se valë të ndryshme të migracionit kanë krijuar grupe individësh që nuk kanë patur mundësi të njihen dhe lidhen me njëri-tjetrin. Gjithashtu, shpresoj shumë që të përftojme nga ky event, disa ide se çfarë për ka nevojë komuniteti të shikoje më shpesh në këtë provincë. Së fundmi, dëshiroj që të kemi mundesinë për të ndarë një mbasdite të këndshme, duke shijuar një pije së bashku me anëtarët e komunitetit.
Si e shihni rolin e profesionistëve shqiptarë në komunitetin lokal dhe se si ata mund të kontribuojnë më shumë?
Profesionistët shqiptarë kanë mundësi të kontribuojnë në disa mënyra thelbësore në komunitetin lokal. Së pari, duke ndarë përvojat dhe njohuritë e tyre të specializuara përmes prezantimeve dhe diskutimeve, ata mund të ofrojnë një perspektivë të pasur për sfidat dhe sukseset në fushat e tyre. Së dyti, ata mund të lidhen me individë që janë në kërkim të mundësive profesionale duke ofruar mentorim dhe këshillim për t’i udhëzuar drejt synimeve dhe qëllimeve të tyre profesionale. Së fundmi, ata mund të ndihmojnë në ndërtimin e lidhjeve më të forta me komunitetin.
A mendoni se evente të tilla mund të ndikojnë në rritjen e bashkëpunimit dhe mundësive profesionale për shqiptarët në këtë provincë?
Po, jam i bindur se evente të tilla kanë potencialin për të ndikuar pozitivisht në rritjen e bashkëpunimit dhe në hapjen e mundësive profesionale për shqiptarët në këtë zonë. Unë besoj se ka shumë potencial që ende nuk është përdorur, dhe çfarë ndodh më pas mbetet për t’u parë në të ardhmen e afërt, pasi kjo nuk do të jetë iniciativa e fundit.
Keni përzgjedhur profesionistë të shquar për të folur në event. Cilat janë pritshmëritë tuaja për pjesëmarrësit dhe se çfarë mund të mësojnë nga përvojat e tyre?
Së pari, do të doja të falënderoja anëtarët e komunitetit për inkurajimin e tyre dhe, natyrisht, folësit që kanë pranuar të ndajnë historitë e tyre. Dua të them që, ndërsa një grup i njerëzve të suksesshëm nga disa fusha si mjekësi, financë, teknologji, etj., do mbajnë disa fjalime, eventi ka një shtrirje të gjerë të profesioneve. Shpresoj që pjesëmarrësit të mësojnë nga sfidat dhe sukseset e kolegëve të tyre dhe të ndihen motivuar për zhvillimin e tyre në fushën e tyre profesionale.
A keni ndonjë mendim shtesë që dëshironi të ndani në lidhje me këtë temë?
Dua të shpreh një ftesë për komunitetin etnik shqiptar në British Columbia për të marrë pjesë në event. Ejani, njihuni me bashkëqytetarët tuaj shqiptarë dhe krijoni njohje të reja!
Shpresoj t’ju shoh më 16 Mars!
Bisedoi: Blerina Ruka
