By Filmi artistik nga Kosova, “Zgjoi” (Hive) me regji të Blerta Bashollit është futur në listën e ngushtë për nominim për Çmimin prestigjioz Oscar. “Zgjoi” bën pjesë në listën e ngushtë të 15 filmave ndërkombëtare për edicionin e 94-të të Çmimit Oscar.
Filmi “Zgjoi” është i frymëzuar nga historia e vërtetë e Fahrije Hotit nga Krusha e Madhe, e cila në kërkim të burrit të saj të humbur gjatë luftës në Kosovë, fillon një biznes bujqësor për ta siguruar mbijetesën e familjes. Ajo e fillon këtë angazhim duke u përballur me një ambient tradicionalisht patriarkal ku ambicia për t’u zhvilluar nuk shihet me sy të mirë.
Askush dhe asgjë nuk e ndaloi Fahrijen në misionin e saj. E pikërisht kjo gjë e intrigoi Bashollin që të realizojë një film të bazuar në jetën e saj. Rolin e Fahrijes e luan aktorja kosovare, Yllka Gashi.
Nëse hyn për nominim, “Zgjoi” apo “Hive” do të bëhet filmi i dytë nga Kosova që arrin sukses të jashtëzakonshëm pas filmit “Shok” i vitit 2016, me regji dhe skenar të britanikut Jamie Donoughue, në të cilin luajnë aktorë kosovarë dhe u xhirua në Kosovë.
“Shok” arriti të ishte filmi i parë që përfaqësoi Kosovën në Oscar, por fatkeqësisht nuk arriti të fitojë një çmim.
Megjithatë, “Shok” i ktheu sytë e botës kah Kosova. Ngjarja e filmit ishte mbështetur në copëza realiteti të luftës së viteve 1998 – 1999 në Kosovë dhe tragjedive të familjeve shqiptare kur përballeshin me armiqësinë dhe brutalitetin e ushtrisë dhe policisë serbe.
Ky film është shpërblyer me çmime të shumta përfshirë edhe tri çmimet kryesore në Sundance Film Festival. Edicioni i 94-të i Çmimit Oscar mbahet më 27 mars, 2022.
