By OpenAI e prezantoi ChatGPT një vit më parë. Chatbot IA ka pasur ndikim të gjerë në botën e punës dhe studimit
ChatGPT e ka bërë shumë më të thjeshtë realizimin e detyrave komplekse si për shembull krijimin dhe redaktimin e artikujve, apo krijimin e regjimeve ushqimore. Chatbot mund të japë rezultate në pak sekonda.
ChatGPT madje mund të realizojë plane ndërtimi të detajuara, ose programe për kompjuterët në pak minuta, detyra që u kërkojnë arkitektëve apo programuesve shumë javë punë. Kur një vit më parë, më 30 nëntor 2022, kompania amerikane e teknologjisë OpenAI prezantoi ChatGPT, i hapi rrugën një revolucioni të vërtetë. Chatbot përdor mësimin automatik (machine learning) dhe është trajnuar me sasi të mëdha të dhënash me tekste. Që prej atëherë, është programuar për të kërkuar në internet imazhe dhe dokumente, pasi i bëhet një pyetje.
Sipas OpenAI, miliona njerëz nisën ta përdorin ChatGPT menjëherë pas prezantimit të tij. Sot, një vit më pas, një numër edhe më i madh njerëzish e kanë përdorur platformën. Vetëm në muajin gusht, faqja e internetit e ChatGPT mori rreth 1.43 miliardë vizita, sipas Similarweb, një analist i trafikut online. Ditët e sotme, megjithatë, shumë përdorues hyjnë në rrjetin nervor të ChatGPT, nëpërmjet aplikacioneve të tjera, në vend të faqes së posaçme të internetit. Për këtë arsye, numri total i përdoruesve të ChatGPT ka të ngjarë të jetë më i lartë.
Cili do të jetë ndikimi i ChatGPT në tregun e punës?
ChatGPT ka shumë të ngjarë të ndikojë drejtpërdrejt në tregun e punës. Banka e investimeve Goldman Sachs vlerëson se sistemet e Inteligjencës Artificiale (IA) si ChatGPT mund të automatizojnë deri në 300 milionë vende pune në të gjithë botën. Profesionet akademike dhe ato krijuese do të preken më së shumti. Edhe pse ky mund të duket një lajm i keq, nuk është e thënë që të jetë. Sipas Goldman Sachs, “ndikimi i IA në tregun e punës ka të ngjarë të jetë i konsiderueshëm. Ndërkohë, pjesa më e madhe e punëve dhe sektorëve janë pjesërisht të ekspozuar ndaj automatizimit, për këtë arsye ka më shumë të ngjarë që IA t’i plotësojë se sa t’i zëvendësojë”. Daniel, një zhvillues software i punësuar në një korporatë e madhe, pajtohet me këtë vlerësim optimist.
Megjithatë, ai nuk dëshiron ta zbulojë emrin e tij të plotë, për shkak të konkurrencës midis kompanive të teknologjisë. “Nuk mund t’i japësh një detyrë programimi të detajuar ChatGPT dhe të presësh rezultate të mira – tha Daniel për Deutsche Welle. – Për mua funksionon më mirë nëse i marr përgjigjet e ChatGPT si këshilla dhe më pas vazhdoj të ndërtoj mbi të, për të krijuar diçka më të mirë në dialog me platformën IA”.
Deri tani, rezultatet e ChatGPT nuk janë gjithnjë të besueshme. Edhe pse në pamje të parë mund të duken bindëse, ndonjëherë janë absurde. OpenAI ka deklaruar se dëshiron t’i eliminojë këto “halucinacione” të IA në një ose dy vitet e ardhshme. Megjithatë, disa ekspertë të teknologjisë dyshojnë nëse të tilla “halucinacione” do të zhduken ndonjëherë. Kjo do të thotë se, nëse ChatGPT përdoret për t’iu përgjigjur pyetjeve shumë të rëndësishme, duhet të kontrollohen me kujdes rezultatet. Edhe transmetuesi ndërkombëtar gjerman DW po eksperimenton gjithashtu me IA. Por “IA gjenerative nuk do ta zëvendësojë punën e gazetarëve tanë”, sipas kryeredaktores së DW, Manuela Kasper-Claridge.
Po plagjiatura?
Universitetet janë disi të shqetësuara për ChatGPT dhe rrezikun e plagjiaturës. Universitetet gjermane, për shembull, nuk kanë përcaktuar ende rregulla të përbashkëta në lidhje me materialet e gjeneruara nga ChatGPT. “Edhe pse ka konsensus mbi faktin që përdorimi i këtyre instrumenteve nuk duhet ndaluar, duhet të nxitet një qasje kritike”, – deklaroi për DW, Martin Wan, nga njësia e dixhitalizimit në Konferencën e Rektorëve Gjermanë.
“Për sa i përket integritetit akademik, kjo përfshin të qenët transparent në përdorimin e mjeteve të tilla dhe të mos i prezantoni tekstet e krijuara nga ChatGPT si punë vetjake”. Sipas Wan, nëse nga njëra anë mund ta përdorni këtë sistem “për të përpiluar gjetjet e fundit të kërkimit”, në anën tjetër duhet të kini parasysh se gjithsesi bëhet fjalë për “halucinacione” dhe duhet të bëni kujdes në lidhje me përmbajtjen e krijuar nga Inteligjenca Artificiale. Për këtë arsye, duket e pamundur që ChatGPT të mund të përdoret për të kryer plagjiaturë në shkallë të gjerë.
“Edhe kur sistemet e IA ofrojnë diçka të ngjashme me burimet, kjo rrallë është si një bibliografi shkencore”, tha Wan. “Këtë e kuptoni relativisht shpejt, sapo të hyni në një temë”. Por ChatGPT mund të përdoret edhe për të studiuar. Dom, një student, tregoi për DW se e përdor platformën mbi të gjitha për të kuptuar tema komplekse. “Është si të kesh dikë pranë teje të cilin mund ta pyesësh. E di që nuk është plotësisht e saktë, por më jep një pikë referimi” – tha Dom. – Nuk do ta kisha kaluar provimin e fundit pa ChatGPT”.
Edhe Teresa, një tjetër studente, tha për DW se edhe ajo e përdor ChatGPT. “Deri më tani e kam përdorur ChatGPT, mbi të gjitha, për të pasur një panoramë të shpejtë mbi çështje të ndryshme”. Studentë të tjerë thanë për DW se janë ende të kujdesshëm në përdorimin e ChatGPT, edhe pse u prezantua një vit më parë. “Nuk i besoj, nuk ka asnjë garanci se është korrekte”, tha Mariya, një tjetër studente. Është e vështirë të thuhet nëse duhet të mbetemi mosbesues ndaj ChatGPT apo ta përqafojmë tërësisht teknologjinë. Por zërat rreth ndryshimeve të fundit në udhëheqjen e OpenAI, duke përfshirë shkarkimin dhe ripunësimin e Sam Altman, të bëjnë të mendosh se kompania tashmë po punon në një sistem të ri IA, që mund të lërë në hije ChatGPT./ Deutsche Welle
