By Diplomacia shqiptare ka zgjedhur të jetë hipokrite, komode për ata që të provokojnë e shkelin sovranitetin.
E nuk është një formë politike për të evituar grindjet, sherret, debate o konflikte, por është mënyra më hileqare për të mbajtur raporte të mira me ata që mund t’iu duhen duke shkelur dhe respektin ndaj vetes.
Në veri të Kosovës situata shfaqet delikate si një fije shkrepse që mjafton një shkëndijë për ta ndezur, e diplomacia shqiptare zgjedh të jetë kutia e heshtjes, me hipokrizinë e shfaqjes asnjanëse ndaj një cështje që së pari e në mënyrë të rrezikshme prek kombin shqiptar e Shqipërinë.
Diplomacia shqiptare zgjedh jo diplomacinë e cila është sjella më korrekte që me inteligjencë shërben për të evituar konflikte, shkelje, sherre e fyerje.
Diplomacia shqiptare zgjedh të jetë hipokrite me hilen komode për të dhënë një imazh të mirë të vetes, e për të fituar të mëdhenjtë e botës në mënyrë thellësisht të pandershme, me veshjen e një maske artificiale që fsheh qëllimet e simulon qasje e veprime duke i mashtruar të gjithë.
Në veri të Kosovës situata është alarmuese, por qeveria shqiptare hesht, hesht e shtin heshtjen.
Hesht Presidenti.
Hesht Kryeministri.
Hesht Diplomacia.
Askush nuk e ka harruar 1998-99 kur veriu i Shqipërisë u përfshi në dramën e luftës ballkanike, kur ushtria shqiptare, shqiptarë të thjeshtë e patriotë u bënë një me vëllezërit kosovarë.
Nuk mund të evitohet një ripërsëritje e një dramë të tillë me heshtje por me diplomaci të vërtetë reaguese që respekton shqiptarët e gjysmën tjetër të Shqipërisë Kosovën.
Një nga një ministrat shqiptarë janë rreshtuar sot para ekraneve për të rrëfyer sukseset bujqësore, kur fushat nuk ka kush t’i punoj.
Kreu i qeverisë nënvizoj qysh në sabah arritjet e politikave shëndetësore kur fshatra e komuna nuk kanë as mjekë e as qëndër mjekërsore, apo krerë organesh sigurie flasin për mbrojtjet nga sulmet kibernetike, kur ato kanë muaj që po bëjnë hatanë me të dhënat strategjike, e i janë vërshyer rrjetit si një kompani tregtimi mallrash online.
E vetmja që nuk ka fol deri tash, për arritjet e sukseset e punës, është Ministria e Cështjeve të Jashtme.
Në një situatë të tillë kur në Kosovë janë rreshtuar me mijëra trupa serbe, armatime të rënda e postoblloqe provokuese, asnjë vend demokratik i lirë, nuk do të kishte heshtur e aq më tepër diplomacia insitucionale e cila minimumu që duhet të bëj është thirrja e Këshillit të Lartë të Sigurisë e të Ambasadorit serb në Tiranë për të shprehur preokupimin e një qasje të tillë luftarake në kufijtë shqiptare.
Kjo sjellje hipokrite nuk të bën të mirën me botën, të bën hilacak me veten, të poshtër me kombin e komod për ata që të provokojnë e shkelin.
