By Kremtohet në Tiranë 35-vjetori i vendosjes së marrëdhënieve diplomatike mes Shqipërisë dhe Kanadasë. Ndërsa vlerësoi rolin e Shqipërisë në rajon, Ambasadorja kanadeze Elissa Goldberg tha se në këto 35 vite, Shqipëria ka bërë hapa të mëdhenj përpara në rrugën e saj drejt Bashkimit Europian.
“Jam e ndërgjegjshme mbi mënyrën sesi Shqipëria ka ndryshuar në këto 35 vite dhe do të vijojë të ndryshojë në rrugën e saj drejt integrimit në Bashkimin Europian. Në të njëjtën kohë kur shohim ndryshimin shoh edhe sesi kufijtë mes vendeve tona lëndojnë. E shoh marrëdhënien e Shqipërisë dhe Kanadasë, si një marrëdhënie miqësie që do të forcohet në vitet në vijim”.
Shqipëria dhe Kanadaja, përveçse janë partnerë dhe aleatë të fortë në NATO, bashkëpunojnë për prioritete të përbashkëta, siç është qëndrimi i unifikuar ndaj Rusisë. Të dy vendet vazhdojnë të thellojnë lidhjet e tyre dhe të bashkëpunojnë për prioritetet e përbashkëta, duke përfshirë qëndrimin e bashkuar në dënimin e agresionit të vazhdueshëm të Rusisë kundër integritetit territorial, sovranitetit dhe pavarësisë së Ukrainës, dhe duke bashkëpunuar ngushtë në përgjigjen ndërkombëtare.
Aktiviteti për 35 vjetorin e marrëdhënieve Shqipëri-Kanada bëri bashkë ambasadorë, politikanë dhe përfaqësues të shumtë të medias dhe biznesit në vend. Marrëdhëniet diplomatike mes Shqipërisë dhe Kanadasë u vendosën më 10 Shtator 1987, pas një sërë negociatash të gjata që kishin nisur që në vitin 1982.
