By 
Nga Blerina Ruka
Montreal-Kanada
Fotografia është një element i rëndësishëm dhe i pandashëm i jetës tonë sidomos pas fuqizimit të epokës digjitale dhe trendeve globale. Secili nga ne në momente të caktuara mundohet të shkrepë foto sa më unike, qofshin ato për t’u ruajtur në arkivën e kujtimeve, për të promovuar vlera të ndryshme, për t’u postuar në rrjetet sociale, për të shprehur një revoltë, dhe pafund arsye tjera. Në diskutime botërore është diskutuar shumë nëse fotografia është art apo teknikë edhe përkundër qëndrimeve të ndryshme mundet të thuhet se fotografia është një kombinim i artit dhe i teknikës. Çfarë e bën artistike një fotografi? Nëse një fotograf profesionist fotografon të njëjtin objekt që fotografon edhe një person i zakonshëm, ku qëndron ndryshimi?
Për Albanian Montreal Press, Ermal Hoxha do të na tregojë për pasionin e tij, dhe fokusin e përditshmërisë së fotografisë së tij.
Kur dhe si ka ardhur fotografia tek ju?
Që kur kam qenë i vogël më kujtohet që të gjitha fotot bardh e zi që kishim në shtëpi i bëja me ngjyra (në mendjen time për t’iu dhënë jetë). Me kalimin e viteve kupton se fotografia nuk ka të bëjë me ngjyrat aq sa ka të bëjë me momentin dhe mesazhin që percjell. Jam intriguar prej fotografisë në momentin që kuptova se përmes saj mund ta ndalojme kohën , emocionin , një kujtim dhe ta mbajmë në dorë pa pasur frikën se na ikën, mjafton të hapim albumin.
Kush është burimi i frymëzimit tënd për të realizuar fotografi aq të veçanta?
Asgjë nuk më inspiron më shumë sesa të fotografoj një imazh autentik që fikson natyrën e vërtetë të subjektit. Më frymëzon ideja që një person e mer në dorë fotografinë që une kam shkrepur dhe buzëqesh sepse atë çfarë ata shohin është dikush ose diçka që ata njohin dhe duan dhe i bën ata të lumtur.
E dimë se fotografia është art dhe pasion por çmund të na thuash për pjesën teknike të saj, na nda disa sekrete profesionale?
Më kujtohet kur shikoja imazhe në të kaluarën dhe thoja ëooë, këtë nuk mund ta arrij kurrë duke harruar faktin se edhe ai që e ka prodhuar atë imazh ka filluar nga hiçi dhe ka arritur deri aty sa të admirohet prej të tjerëve. Në kohën e sotme kur ne mund të krijojmë imazhe nga hiçi përmes softëareve të ndryshme është padyshim më e lehtë sesa dikur kur duhej të prisje me orë të tëra e nganjëherë edhe me ditë të tëra për të kapur momentin e duhur. Mjafton për të njohur disa principe bazë në photoshop për të dërguar dikë nga i ftohti i Antarktidës në plazhet e Maldives.
Nuk ka sekret profesional , askush nuk ka lindur i ditur. Mjaftojmë të praktojmë sa më shumë dhe të mësojmë aftësi të reja çdo ditë. Fatmirësisht ka kaq shumë platforma pa pagesë që duhet t’i shfrytëzojmë si p.sh ( youtube,coursera,udemy etc … )
Cila është vepra jote e preferuar dhe pse?
Është fotoja e një gruaje në rrugën « Saint Catherine » në Montreal e ulur në trotuar në temperaturë -33 e cila po lexonte një libër. Kur e pyeta nëse kishte të ftohte, ajo më tha:- jo, sepse në historinë që po lexonte bënte ngrohtë . Quhej madame Julie.
Cili është mesazhi që mundohesh të përcjellësh përmes fotografive të tua?
Një foto vlen sa 1000 fjalë,është një shprehje. Mesazhi është të percjellë atë që unë mendoj se është e bukur dhe shprehëse.
