Mehdi Isufi: “Jeta ime e lidhur me Shqiptarinë deri në deje”

Mehdi Isufi: “Jeta ime e lidhur me Shqiptarinë deri në deje”

Granby-Quebec

Mehdi Isufi është nga emrat më të vjetër të foklorit si dhe anëtar i komunitetit shqiptar të vendosur më herët në Quebec. Me një jetë intesive, sakrifica dhe me mjaft kujtime, ai është gjithmonë i gatshëm t’u bashkëngjitet aktiviteteve shqiptare. Për të nuk ka qenë asnjëherë e rëndësishme nga Shqipëria apo nga Kosova, mjafton të flisje shqip dhe tek ai gjeje një vëlla. Në këtë intervistë, ai na tregon marrëdhënien e tij të ngushtë me vendlindjen dhe disa pengje nga jeta e sotme në Kosovë.

Si i ruani ju traditat shqiptare?
Unë traditën shqiptare e ruaj me shumë fanatizëm sepse jam më i vjetri në Europë! E ruaj duke folur shqip, duke kënduar shqip, duke dëgjuar shqip dhe marr frymë shqip .

Ju jeni një njohësi i mirë i muzikës, si janë marrëdhëniet tuaja me folklorin ?
Muzikën e njoh shumë mirë, njoh vokalin e çdo këngëtari. Me folklorin kam lindur, e kam në gjak. Unë kur interpretoj një këngë edhe e përjetoj atë. Disa herë kur i këndoj këngët e trimërive, me duket sikur trimëreshat dhe trimat më rrethojnë. Marrëdhëniet e mia me folkorin janë shumë të ngushta. Kur kam emigruar në Kanada para 21 viteve, në avion kam hyrë në një dorë sharkinë dhe në tjetrën çiftelin, dhe vajzën time Donikën, 6 muajshe, andaj folklorin e kam si pjesë e trupit tim. Më kujtohet një histori e shkurtër kur në vitin 1990 më kërkonte UDBA-ja Jugosllave se gjoja në një dasëm kam kënduar këngë nacionaliste, për fat të mirë isha në Zvicër.

Cila është përditshmëria juaj, puna juaj, aktiviteti juaj ditor ?
Unë punoj në kompaninë e prodhimeve rekreative BRP në Valcourt, prej 8 vitesh kam një kompani ndërtimi «GroupeAlba Renovations» dhe para disa viteve mora edhe një ndërtesë me 18 apartamente dhe kështu që unë jam shumë i angazhuar. Ushtroj aktivitete sportive, trajnoj një grup të moshës 15 vjeçare dhe u përgatis ushtrime fizike për trupin; mix sport, një herë në javë në natyrë.

Kur ktheheni në Kosovë, a vini re ndryshime në vendlindje?
Vendlindjen time, Kosovë e kam vizituar në muajin shtator –tetor. Anjëherë nuk kisha besuar se edhe pas 20 viteve lirie populli vuan ende për një jetë normale. Unë pashë varfëri, papunësi, korrupsion i dukshëm, kriminalitet padrejtesi etj . Isha në tubimin e Vetëvendosjes në Prishtinë dhe kisha besimin se Albin Kurti do t’i fitonte zgjedhjet, edhe pse me vonesë, më mirë dikur se hiç – thotë populli. Unë besoj se me rininë shqiptare do të bëhet më mirë.

A mendoni se Kanadaja ju ka dhënë më shumë mundësi në jetë ?
Po të kisha lindur në Kanada, sot sigurisht kisha tjetër kahje të jetës time. Kanadaja është vendi i mundësive, unë e quaj atdheu im i dytë. Sigurisht që jam shumë i lumtur që jetoj këtu bashkë me sukseset që kanë edhe fëmijët e mi në jetën e tyre studentore dhe profesionale.

Bisedoi: Blerina Ruka

administrator

Related Articles