By Brigjet e Pogradecit janë përfshirë sërish nga një pamje spektakolare me rikthimin e flamingove bregliqenorë, një fenomen që përtej magjisë vizuale fsheh arsyet e forta ekologjike pse këta shpendë po e preferojnë gjithnjë e më shumë vijën tonë bregliqenore.
Sipas ekspertëve, ky stacionim në brezin bregliqenor lidhet drejtpërdrejt me ndryshimet e sforcuara hidrologjike, ku rënia e dukshme e nivelit të ujit ka krijuar habitatin ideal për ta. Një faktor kyç në këtë situatë mbetet menaxhimi i ujërave nga pala maqedonase dhe hapja e portave të shkarkimit në Strugë, veçanërisht gjatë stinës së vjeshtës. Ky proces, i kombinuar me faktorët klimatikë, ka bërë që vija bregliqenore të tërhiqet ndjeshëm, duke transformuar pjesë të liqenit të thellë tektonik në minilaguna artificiale dhe cekëtira të mbushura me alga e mikroorganizma.
Pikërisht ky nivel i ulët i ujit në hapësirën bregliqenore të Tushemishtit dhe Drilonit u mundëson flamingove të qëndrojnë në këmbë dhe të ushqehen me lehtësi. Megjithatë, kjo “parajsë” e re në ekosistemin bregliqenor po dëshmon dy anë të medaljes: nga njëra anë tregon se bregu ofron qetësi mjedisore për individët në tranzit, por nga ana tjetër, shërben si një këmbëz alarmi dhe një apel i hapur për mbrojtjen urgjente të kësaj pasurie të mbrojtur nga UNESCO.
