By Rrugëtimi i Teutës, Mbretëreshës së Deteve, nuk mund të ishte pa tallaze. Por, siç ndodh me detin, edhe pas furtunave vjen gjithmonë një breg.
Në vitin 2022 nisa me shumë dashuri e përkushtim këtë projekt: t’i jepnim Shqipërisë dhe trojeve shqiptare një monument kushtuar Mbretëreshës Teuta.
Gjithçka nisi këtu, në faqen time. Ideja, mbledhja e fondit, organizimi, konkursi, përzgjedhja e skulptorit, realizimi dhe, në fund, konkretizimi i projektit. Të gjitha këto u realizuan pa asnjë mbështetje nga autoritetet shtetërore! Asnjë!
Vështirësitë vijuan më tej!
Nuk e mendoja se do të duheshin katër vite për ta përfunduar. Rrugëtimi pati pritje, vështirësi dhe jo pak hezitime për vendin ku do të vendosej shtatorja. Por, në fund, ndoshta këto vështirësi i destinuan Teutës një hapësirë të denjë për madhështinë e saj.
Në Lezhë.
Për gjithë historinë e këtij rrugëtimi do të flas më gjatë në vijim. Sot dua të qëndrojmë te gëzimi i këtij momenti dhe te fakti që një ide e nisur katër vite më parë tashmë është bërë realitet.
Faleminderit të gjithë shqiptarëve që e mbështetën këtë projekt. Pa mbështetjen tuaj, ju që e besuat këtë ide që në fillim, ai nuk do të ishte bërë i mundur. Ju ishit forca dhe oksigjeni i tij.
Urime skulptorit Julian Muçollari për madhështinë që i ka dhënë kësaj shtatoreje.
Mirënjohje për Pjerin Ndreun, Kryetarin e Bashkisë Lezhë, i cili e mirëpriti këtë ide dhe krijoi mundësinë që Teuta të vendosej në territorin e kësaj bashkie.
Faleminderit mikut tim Paulin Zefi, që ndihmoi, u përpoq dhe ishte një nga shtytësit më të mëdhenj që Teuta të vinte në Lezhë.
Një përqafim zemre për miqtë e afërt, Behlul Gashi, Mevlan Mata, Albin Laci, Vilson Dautaj dhe Klodian Marku. Pa mbështetjen e tyre, konkretizimi i këtij projekti do të ishte shumë më i vështirë.
Në fund, Teuta gjeti bregun e saj në Lezhë, në një vend prej nga ku horizonti hapet larg dhe deti duket si vazhdim i historisë së saj. Ndoshta nuk mund të kishte vend më të përshtatshëm se Ballkoni Panoramik, në rrugën Shëngjin – Velipojë; aty ku ajo mund të vazhdojë të shohë përtej, ashtu siç ka bërë gjithmonë.
