By Jakup Krasniqi është dënuar me 25 vjet burgim, pasi u shpall fajtor për disa nga akuzat për krime lufte të ngritura ndaj tij në procesin gjyqësor në Hagë.
Ish-kryetari i Kuvendit të Kosovës u gjet fajtor për arrestim dhe ndalim të paligjshëm ose arbitrar, trajtim mizor, torturë dhe vrasje të paligjshme.
Sipas vendimit, Krasniqi u shpall fajtor për arrestim dhe ndalim të paligjshëm ose arbitrar të së paku 385 personave, për trajtim mizor ndaj së paku 49 personave dhe për vrasje të paligjshme në të paktën 96 raste.
Trupi gjykues caktoi dënime të veçanta për veprat për të cilat Krasniqi u shpall fajtor: 15 vjet burgim për arrestimin dhe ndalimin e paligjshëm ose arbitrar, katër vjet për trajtimin mizor, 20 vjet për torturën dhe 23 vjet për vrasjen e paligjshme. Në përfundim, u vendos një dënim i njësuar prej 25 vjetësh burgim, ku llogaritet edhe koha e kaluar në paraburgim.
Krasniqi nuk u shpall fajtor për të gjitha akuzat. Trupi gjykues e shpalli të pafajshëm për disa incidente të përfshira në aktakuzë, si dhe për akuzat për krime kundër njerëzimit, përfshirë burgosjen, aktet e tjera çnjerëzore, vrasjen e paligjshme dhe zhdukjen me forcë.
Krasniqi, Hashim Thaçi, Kadri Veseli dhe Rexhep Selimi u përballën me të njëjtin proces gjyqësor, i cili nisi në prill të vitit 2023.
