By Detaje të reja janë zbardhur nga ngjarja e rëndë në Graz të Austrisë, ku 24-vjeçarja shqiptare Abigel Laçi, me origjinë nga Vlora, është gjetur e pajetë në apartamentin ku jetonte me partnerin e saj.
Në lidhje me ngjarjen, policia austriake ka arrestuar një 23-vjeçar, i cili dyshohet si autor i krimit. Sipas të dhënave të deritanishme, i arrestuari është vëllai i partnerit të viktimës.
I riu është ndaluar nga policia në shkallët e pallatit, pak pasi dyshohet se kishte dalë nga apartamenti. Dëshmitarët e kanë përshkruar atë si të mbuluar me gjak.
Sipas të dhënave paraprake të hetimit, 23-vjeçari dyshohet se ka shkuar i vetëm në banesë dhe ka hyrë me forcë. Në atë moment, Abigel Laçi ndodhej e vetme në apartament, pasi partneri i saj nuk ishte i pranishëm.
Hetuesit dyshojnë se e reja është sulmuar me çekiç dhe se plagët e marra kanë rezultuar fatale. Ajo është gjetur pa shenja jete nga efektivët e policisë, të cilët mbërritën në banesë pasi autoritetet u njoftuan rreth orës 12:40 të së enjtes, 3 shtator.
Ngjarja ka ndodhur në një apartament në qendër të Grazit. Autoritetet konfirmuan se 24-vjeçarja kishte humbur jetën në vendngjarje.
Fillimisht policia njoftoi se personi i arrestuar kishte lidhje familjare me viktimën, ndërsa më pas u saktësua se bëhej fjalë për vëllain e partnerit të saj.
Gjatë marrjes në pyetje, 23-vjeçari ka zgjedhur të mos japë deklarime. Ai nuk ka shpjeguar rrethanat e ngjarjes dhe as motivin e mundshëm të sulmit. Aktualisht po hetohet nën dyshimin për vrasje.
Autopsia e trupit të Abigel Laçit është kryer, ndërsa hetuesit po punojnë për të rindërtuar dinamikën e plotë të ngjarjes dhe për të zbuluar motivin.
Deri më tani, autoritetet austriake nuk kanë bërë të ditur zyrtarisht se çfarë mund të ketë çuar në sulmin fatal ndaj 24-vjeçares shqiptare.
