By Intervistë ekskluzive me Rudin Daklin, ideatorin e Panairit të Librit në Kanada
Në kuadër të edicionit të parë të Festivalit të Librit Shqiptar në Montreal, Albanian Montreal Press zhvilloi një intervistë me z. Rudin Dakli, ideatorin dhe organizatorin kryesor të këtij aktiviteti kulturor që ka marrë jetë fillimisht në Toronto dhe tashmë po zgjerohet në qytete të tjera me komunitete shqiptare të rëndësishme. Z. Dakli ndan me ne historikun, sfidat dhe vizionin e tij për të ardhmen e këtij panairi në diasporë.
Pas suksesit të padiskutueshëm në Toronto, Festivalit të Librit Shqiptar i hapet rruga drejt qytetit të Montrealit për herë të parë. Ky aktivitet kulturor vjen si një përpjekje e përbashkët për të afruar librin shqip më pranë komunitetit shqiptar të këtij qyteti dhe për të forcuar lidhjen me gjuhën dhe kulturën amtare në diasporë. Në bashkëpunim me shoqatat shqiptare të Montrealit, festivali sjell libra, autorë dhe aktivitete për të gjitha moshat, duke shpresuar të vendosë themelet e një tradite të re kulturore.
Si lindi ideja për të sjellë Festivalin e Librit Shqiptar nga Toronto në Montreal, dhe çfarë ju motivoi ta realizoni këtë nismë?
Ideja për të sjellë festivalin në Montreal lindi gjatë organizimit të edicionit të parë në Toronto, që u konceptua si një test për të matur interesin e komunitetit për evente kulturore me librin në qendër. Pjesëmarrja e gjerë në Toronto na inkurajoi të mendojmë për zgjerimin e aktivitetit në qytete të tjera me prani të fortë shqiptare.
Në një bisedë të rastësishme me Gojard Kodrën, një nga vullnetarët tanë që krijoi një atmosferë shumë të këndshme gjatë festivalit të Torontos përmes muzikës, ai na ndihmoi të lidheshim me anëtarë të komunitetit në Montreal. Më vonë, pas një kontakti me z. Ermir Dardha, bisedat me të u bënë pikënisje për një bashkëpunim konkret mes shoqatës sonë, ACDA, dhe dy shoqatave të Montrealit: Shoqata Kulturore Shqiptare në Montreal dhe Shoqata Kosova në Montreal.
Përgatitjet vazhduan përmes komunikimeve të rregullta për planifikimin, logjistikën dhe organizimin e festivalit, ku rolin kryesor e mbajtën shoqatat vendase. Falë përpjekjeve të përbashkëta, sot kemi kënaqësinë të hapim për herë të parë Festivalin e Librit Shqiptar në Montreal.
Cilat janë pritshmëritë tuaja nga ky festival i parë në Montreal, si për pjesëmarrjen ashtu edhe për ndikimin në komunitetin shqiptar këtu?
Edhe pse nuk e njoh sa duhet komunitetin shqiptar në Montreal, përtej kontakteve personale dhe bashkëpunimit me përfaqësuesit e dy shoqatave, nga përvoja në Toronto kam arsye për të besuar se festivali do të krijojë një atmosferë të ngrohtë komunitare.
Shpresojmë që kjo ngjarje të shërbejë si pikëtakim për të apasionuarit pas librit shqip, si dhe si një hap përpara në forcimin e ndjenjës së përkatësisë dhe trashëgimisë kulturore.
A mund të na tregoni pak më shumë rreth botuesve, autorëve dhe aktiviteteve që do të jenë pjesë e këtij edicioni të parë në Montreal?
Në Montreal do të sjellim rreth 650 tituj librash nga 364 autorë dhe 91 shtëpi botuese, shqiptare dhe të huaja. Me disa përjashtime të titujve që u shitën plotësisht në Toronto (si fjalorët, për të cilët nuk pati shumë interes), pjesa tjetër e katalogut do të jetë e njëjtë.
Gjithashtu, janë planifikuar tre biseda me shkrimtarë shqiptaro-kanadezë dhe aktivitete të dedikuara për fëmijët dhe familjet e tyre, të cilët do të jenë pjesë aktive e festivalit. Programi i detajuar është ndërtuar dhe menaxhohet nga dy shoqatat shqiptare në Montreal.
Si e shihni rolin e festivalit të librit në ruajtjen dhe promovimin e gjuhës dhe kulturës shqiptare në diasporë?
Evente të tilla kanë një ndikim të madh pozitiv në ruajtjen dhe promovimin e gjuhës dhe kulturës shqiptare në diasporë. Ato i japin mundësi lexuesve të njihen me larminë e autorëve, zhanreve, përkthimeve dhe zhvillimeve më të fundit në fushën e letërsisë shqipe.
Gjithashtu, ato krijojnë një lidhje kulturore të natyrshme edhe për brezat e rinj, duke i nxitur të afrohen me gjuhën dhe trashëgiminë e tyre përmes leximit dhe aktiviteteve interaktive.
A besoni se do të kthehet në traditë një aktivitet i tillë?
Shpresoj shumë që po. Ky festival është më shumë se një panair libri; është një formë prezantimi e denjë e komunitetit shqiptar në shoqërinë kanadeze. Ai ndihmon në ruajtjen e identitetit tonë kulturor dhe ndihmon që zëri i letërsisë shqipe të dëgjohet dhe të vlerësohet më gjerë.
