By Tragjedisë ajrore të kësaj të enjteje në Uashington, presidenti amerikan Donald Tramp tha se nuk i ka mbijetuar askush. Në një konferencë për mediat, shefi i Shtëpisë së Bardhë bëri të ditur se për shkaqet e tragjedisë po hetohet, por akuzoi administratën pararendëse të Xho Bajdenit për punësim të njerëzve të paaftë.
“Nxitja e diversitetit në Autoritetin Federal të Aviacionit përfshin punësimin e njerëzve me paaftësi të theksuara intelektuale dhe psiqike”, tha Presidenti Donald Trump.
Aksidenti ndodhi në orën 21.00 të së mërkurës sipas orës lokale të Uashingtonit kur një helikopter Black Hawk i ushtrisë goditi avionin e pasagjerëve që po ulej në aeroportin Regan pas ardhjes nga Kansasi. Në bordin e avionit ndodheshin 64 persona, ndër të cilët 4 pjesëtarë të ekuipazhit. Ndërsa me helikopter fluturonin 3 ushtarakë. Me këtë avion, ktheheshin nga Kansasi, disa sportistë të njohur amerikanë të patinazhit në akull dhe familjarë të tyre. Në bord ndodheshin edhe dy sportistë rusë të patinazhit. Hera e fundit që një avion pasagjerësh është përfshirë në një aksident në SHBA ka para 16 vitesh.
Gjatë fjalës së tij, Trump thotë se Amerika është në zi teksa shton se kjo ngjarje ka tronditur shumë persona edhe nga kombet e tjera që janë përfshirë në aksidentin ajror. Presidenti shprehet se në aeroplan kishte rusë, por nuk përmend asnjë kombësi tjetër. Ai thotë se ka ide dhe teori për atë që ka ndodhur, megjithëse ka pranuar se hetimi është ende në fillimet e tij. Trump nuk la pa goditur kundërshtarët e tij politikë, këtë herë Barack Obamën. Për ish-Presidentin, Trump tha se ka punësuar personel mediokër për punët e kontrollit të trafikut ajror që kërkojnë inteligjencë superiore.
Më tej, Trump u shpreh se nuk dihet se çfarë e ka shkaktuar këtë përplasje, por shtoi se një hetim gjithëpërfshirës në lidhje me ngjarjen do të kryhet.
“Ne do të zbulojmë se si ndodhi kjo fatkeqësi dhe do të sigurojmë që asgjë e tillë të mos ndodhë më. Administrata Federale e Aviacionit, Bordi Kombëtar i Sigurisë së Transportit dhe ushtria amerikane do të kryejnë një hetim gjithëpërfshirës. Ne do të punojmë pa u lodhru për të kuptuar atë se çfarë ka ndodhur”, deklaroi Presidenti i SHBA.
Sipas Presidentit, avioni po kryente të gjitha veprimet në rregull, por shton se helikopteri kishte shkuar në një kënd që ishte jashtëzakonisht i keq. Trump më pas thotë se helikopteri kishte aftësinë të ndalonte, të ngjitej, të zbriste ose të kthehej.
“Kthesa që bëri nuk ishte e duhura, natyrisht,” thotë ai.
Trump tregon një nga urdhrat ekzekutivë që nënshkroi me marrjen e detyrës javën e kaluar, për të cilin thotë se rikthehen standardet për kontrollorët e trafikut ajror dhe të tjerë.
