By Sa euro i jepte bosi i krimit të dashurës së tij?
Çfarë çante i dhuroi?
Ku e çonte për pushime?
Këto “lajme” kanë qarkulluar që nga e premtja e kaluar, që SPAK me praktiken e tij e ka kthyer në “të premte të zezë”, duke i lënë të gjithë sa kurioz aq edhe të habitur.
Nuk besoj se ka gazetar sot që i ka rezistuar detajeve të zbuluara në dosjen voluminoze “Metamorfoza 2”, e cila nuk zhgënjeu me episodet e saj as në sezonin e dytë.
Një kineast tashmë e ka një skenar pothuajse të gatshëm për një film, por le të kthehemi te çështja.
Vëmendja e kësaj dosjeje padyshim ra mbi vajzat e bukura, lidhjet e boseve të krimit me “misset”. Kjo histori, sa romantike aq edhe e errët, sherben si muzë për klubin e thashethemeve.
Ndërkohë, dosja tregoi se para larjes së hesapeve, askush nuk kursehej – as fëmijët e as familjet e pafajshme, as qytetarët e këtij vendi, që punojnë për një pagë që nuk mbulon shpenzimet e muajit.
Vetëm pak kohë më parë, një banakiere në Dom Bosko vdiq duke vrapuar për të mbrojtur mbesën e saj 6-vjeçare nga armët e kallashnikovëve, të atyre që ndoshta kurrë nuk ua kishte dëgjuar emrin. Por banakierja, viktimë e këtyre krimeve, nuk gjeneron aq shumë vëmendje sa miset që “fusin” gangot në kurth.
Po çfarë ka për t’u habitur?
A nuk kemi qenë dëshmitarë të veprimeve të këtyre “te fortëve”, kur i shihnim live në ambient publike apo kur transmetohej live djegia e makinave të tyre pas kryerjes së krimit.
Pse shokohemi sot kur lexojmë skenarët e atyre që jo vetem i njohim, por edhe i njihnim.
Ajo çka mungon në valën e metamorfozës kriminale është analiza e metamorfozës së shoqërisë dhe medias.
Sot, modeli i suksesit për të rinjtë është pasurimi brenda natës, jeta luksoze që ta postojmë në Instagram dhe TikTok për djemtë, si dhe të qenurit aq të bukura sa të përzgjidhesh nga bosi i radhës si lodër argëtuese në tavolinën e negociatave të “mallit”.
Këtë dosje e lexon sot ekonomisti, gazetari, mekaniku, kamarieri dhe polici që rropatet në diell për 10 orë punë dhe merr 1/10 e një informatori të rëndomtë të bosit të krimit. Ndaj, nuk duhet të çuditemi që të rinjtë kalojnë Kanalin e La Manshit, mbyllen në shtëpitë e barit në Spanjë apo vrasin dikë për llogari të grupeve në Shqipërinë e sotme.
Dosja Metamorfoza është në gjykatë. Është koha që dosja “Metamorfoza e shoqërisë dhe medias” të dalë sa më shpejt në gjykatën e opinionit publik.
