By Pas refuzimit të ofertës së qeverisë të pagave nga sindikatat, kryeministri François Legault thotë se është gati të negociojë sërish në këmbim të përfundimit të “ngurtësisë” së marrëveshjeve kolektive. Sipas tij, e ardhmja në sektorin e shëndetësisë dhe arsimit janë në ngërç.
Mungesa e përmirësimit të shërbimeve në këta dy sektorë është arsyeja kryesore e pakënaqësisë së elektoratit ndaj qeverisë Legault, sipas një sondazhi të Léger. “Ne jemi shumë të hapur për çështjet financiare. Presim që të biem dakord për rritjen e pagave. Vështirësia qëndron se ka shumë rezistencë nga sindikatat për të na dhënë kompetencat normale menaxheriale që duhet të kemi si një organizatë efikase,” argumentoi François Legault gjatë një konference për shtyp këtë mëngjes. Ditën e djeshme, të mërkurën, qeveria paraqiti një ofertë të re pagash për 600,000 punonjës të shtetit. Fronti i përbashkët dhe sindikatat e tjera e hodhën poshtë menjëherë, duke e cilësuar të pamjaftueshme rritjen e pagave prej 12.7% në pesë vjet, ndërkohë lëvizja e grevës vazhdon.
François Legault
“Për mua është i rëndësishëm përmirësimi i shërbimeve shëndetësore dhe arsimore, saqë jemi të hapur për kompromise të tjera për pagat ”, u shpreh Legault. Për më tepër, oferta e re e pagës nuk u cilësua si përfundimtare nga provinca e Quebec. “Për dekada, ne nuk kemi qenë në gjendje të përmirësojmë shërbimet arsimore dhe shëndetësore, për shkak të ngurtësisë së marrëveshjeve kolektive,” tha ai. Ai argumentoi se një sindikatë mund të bllokojë një marrëveshje mbi një dakortësi midis një menaxheri dhe një punonjësi, nuk është normale që rrjeti ynë të menaxhohet nga sindikatat dhe jo nga përfaqësuesit,” shtoi ai. Kjo është në qendër të negociatave.”
Sipas tij, nëse sindikatat e pranojnë kërkesën, përfaqësuesit do të marrin kompetenca të reja, por në këmbim do të bëhen “përgjegjës për rezultatet” me reformat e ministrave Christian Dubé dhe Bernard Drainville.
“Nëse e marrim atë, dhe unë jam i vendosur t’i marr të dyja, do të jemi në gjendje të përmirësojmë më në fund shërbimet shëndetësore dhe arsimore,” tha ai. Gjatë prezantimit të përditësimit të tij ekonomik, ministri i Financave Eric Girard tha se qeveria nuk ka vend për manovrim dhe se “çdo shpenzim shtesë do të kërkojë huamarrje”. Megjithatë, François Legault tregoi se oferta e re, e cila përfaqëson një shpenzim shtesë prej një miliard dollarësh në vit në terma afatgjatë krahasuar me propozimin e mëparshëm, bie brenda kornizës financiare të qeverisë. Fronti i përbashkët (CSN, FTQ, CSQ dhe APTS) ngulmon në nisjen e shtatë ditëve radhazi të grevës duke filluar nga e premtja. Federata Autonome e Arsimit (FAE) vazhdon grevën e përgjithshme të pacaktuar, e cila ka vazhduar që prej 23 nëntorit. Federata Ndërprofesionale e Shëndetësisë (FIQ) do të hyjë në grevë nga data 11 deri më 14 dhjetor. Sindikata e Profesionistëve të Qeverisë së Kebekut (SPGQ), anëtarët e të cilit janë në 10 CEGEP-e, do ti bashkohen grevës nga 13 deri më 15 dhjetor.
TOMMY CHOUINARD
LA PRESSE
