By Studentët e Universitetit të Harvardit në Masaçusets në Shtetet e Bashkuara të Amerikës, tashmë kanë mundësi të zgjedhin të studiojnë Gjuhën Shqipe pasi zyrtarisht ajo është pjesë e kurrikulave të gjuhës. Gjuhën Shqipe bëhet pjesë e kurrikulave të gjuhëve dhe qytetërimeve.
Lajmi është bërë i ditur nga Harvard Magazine, i cili njofton se Gjuha Shqipe është vendosur në departamentin e gjuhëve dhe qytetërimeve të lindjes së afërt, krah armenishtes, persishtes, turqishtes ndërsa orët e shqipes elementare kanë nisur që këtë semestër.
Edona Cosovic, kryetare e vitit të dytë dhe vajza e një emigranti shqiptar nga Mali i Zi, tha për “Harvard Magazine” se ishte një nga studentët që nxiti futjen e gjuhës shqipe në Harvard. E rritur në SHBA, ajo mësoi të fliste gjuhën shqipe në mënyrë jo formale në shtëpi, por e kishte të vështirë ta ruante gjuhën pavarësisht dëshirës së saj të madhe për ta bërë këtë.
Fillimisht ky universitet do të ofrojë kurse për nivelin elementar të Gjuhës Shqipe me synimin që më pas të vijojë dhe me nivelin e mesëm dhe të avancuar. Përpjekjet për futjen e Shqipes në kurrikulat shkollore u zyrtarizuan në vitin 2022, iniciativë kjo nga një grup shqiptarësh të Malit të Zi.
Në Shtetet e Bashkuar të Amerikës, Gjuha Shqipe është bërë pjesë e kurrikulave edhe në Universitetin e Arizonës, Universitetin e Depaul dhe Kolegjin Mercy në New York.
Në mars të vitit 2022, Cosovic pyeti për mundësinë e ndërtimit të një kursi në Harvard. Kështu ajo foli me Eva Stathi Misho-n, një koordinatore studentore e NELC. Para se të vinte në Shtetet e Bashkuara për të studiuar për klasikë në Kolegjin Hellenic në Brookline, Stathi Misho studioi gjuhë dhe letërsi shqipe në Tiranë.
Stathi Misho shpesh pyetet se çfarë gjuhe flitet në Shqipëri, kështu që beson se ky kurs do ta bëjë përgjigjen e kësaj pyetjeje më pak të lehtë.
Kjo tregon se “ne ekzistojmë [dhe] kemi një gjuhë”, thotë ajo.
Faton Limani i cili është Administrator i Departamentit të Letërsisë Krahasuese në Universitetin e Harvardit pati njoftuar 1 vit më parë se gjuha shqipe do të futej si lëndë zgjedhore. Ai tha se gjuha shqipe do të ofrohet gjatë tërë vitit në këtë universitet dhe atë në tri nivele, fillestar, mesatar dhe të avancuar duke theksuar se do të jetë në të gjitha nivelet e studimit.
Limani në një intervistë për Telegrafin pati treguar për ecurinë se si hyri si lëndë zgjedhore, si u mirëprit nga studentët atje dhe kur do të nis së ligjëruari si lëndë.
Ai deklaroi se së bashku me një kolege të tij e kishin si ide futjen e Gjuhës shqipe si lëndë zgjedhore, mirëpo iniciativa u bë nga disa studentë të nivelit Bachelor, shqiptaro-amerikan.
“Bashkë me kolegen time Eva, e cila punon në një departamentin tjetër e kishim si ide. Mirëpo ajo që e përshpejtoi procesin që ne të arrinim të fusim Gjuhën Shqipe si lëndë zgjedhore ishte kërkesa e disa studentëve shqiptaro-amerikan të nivelit Bachelor. Ata filluan të kërkojnë që të marrin një gjuhë të huaj si lëndë zgjedhore dhe kërkuan që gjuha shqipe të jetë një ndër to. Mirëpo meqë ata kishin kërkuar në disa departamente dhe nuk kishin informacion, erdhi lajmi dhe në departamentin tonë. Filluam që të bisedojmë me disa departamente duke përfshi dhe departamentin ku unë jam administratorë dhe u bë e mundur që Gjuha shqipe të futet si lëndë zgjedhore”, tregoi Limani.
