By Në amfiteatrin e Universitetit të British Columbia-s, në qytetin e Vancouverit, më 10 tetor 2023, do të mbahet një event ku edukimi, trashëgimia, kinemaja dhe historia ndërthuren më së miri përmes shfaqjes së dokumentarit “Besa- The Promise”. Ky film-dokumentar, është një dëshmi e fuqishme për kodin shqiptar të besës dhe rolin e saj gjatë periudhës historike dhe të trazuar të Luftës së Dytë Botërore.
Filmi-dokumentar tregon historinë e popullit shqiptar, që gjatë Luftës së Dytë Botërore, strehuan dhe mbrojtën rreth dy mijë hebrenj nga nazistët, të udhëzuar nga kodi i tyre i nderit, besa.
Kodi etik që mban gjallë një popull, mbeti i parrëfyer për shumë kohë për shkak të regjimit komunist të pasluftës. Narrativa e dokumentarit është kornizuar rreth fotografit hebreo-amerikan, Norman H. Gershman, i dedikuar dokumentimit të guximit të shqiptarëve, dhe Rexhep Hoxhës, një qytetar i zakonshëm nga Tirana me një histori të jashtëzakonshme. Rexhepi kërkon ndihmën e Norman për të gjetur një familje hebraike që prindërit e tij mbrojtën gjatë luftës, për të kthyer tek ta tre libra hebrenj që ata lanë pas.
Historia e Rexhepit dhe e disa familjeve të tjera, ndër mijëra prej tyre, nderojnë zgjedhjet vetëmohuese të shqiptarëve të asaj kohe, për të shpëtuar hebrenjtë e ardhur në Shqipëri.
Shfaqja pritet të tërheqë një audiencë të gjerë, duke përfshirë anëtarë të komunitetit shqiptar dhe atë hebre në British Columbia, studentë, akademikë dhe dashamirës të kinemasë.
Eventi do të përfshijë folës si: Dr. Anna Kohen, vajza e një familjeje hebreje të strehuar në Vlorë gjatë Luftës së Dytë Botërore; Dr. Richard Menkis (Profesor i historisë mesjetare dhe moderne hebreje), Nina Kreiger ( Drejtore Ekzekutive e Qendrës Edukative të Holokaustit në Vankuver), Ardian Lagji (Kryetar i Shoqatës “EaglesLand Cultural Society of BC”).
Që në ditët e para të lancimit të eventit, është vënë re një interes mjaft i madh. Eventi është pa pagesë për pjesëmarrësit, por nevojitet që paraprakisht të konfirmohet pjesëmarrja. Konfirmimi do të bëhet përmes këtij linku.
Eventi organizohet nga Amarildo Ceka me suportin e UBC Connects @Robson Square, Vancouver Holocaust Education Centre, EaglesLand Albanian Cultural Society of BC, Albanian American Woman’s Organization-Florida Chapter.
