By Një pyetje:
Kam një pyetje të drejtpërdrejtë për miqtë në Facebook që janë aktivë në mbrojtje të Ramës. Unë e kuptoj se si në demokraci njerëzit kanë mendime të ndryshme dhe parapëlqime të ndryshme për parti politike dhe politikanë dhe se mendimi ndryshe duhet respektuar. Megjithatë, qëndrimi, opinioni politik duhet të jetë i bazuar diku.
Pyetja ime është: Si ia justifikoni Edi Ramës ngritjen e sistemit të patronazhistëve?
Po e zbërthej pak që të kuptohet më qartë: Si ia justifikoni patronazhistët, rrjetin e spiunëve të paguar e vullnetarë, të njerëzve pa shtyllë kurrizore, pa busull morale, pa kurrfarë niveli intelektual apo aftësi për mendim të pavarur që ka në dorë gjithë informacionin personal të secilit prej nesh – timin, tujain, të familjeve tona, të fëmijëve tanë, brenda dhe jashtë Shqipërisë; të atyre që na dijnë dhe nuk bëjnë as përpjekjen më të vogël për të na e ruajtur edhe atë më “sekretin” – numrin e identifikimit, e le më pastaj adresat, vendet e punës dhe parapëlqimet politike. Si e justifikoni ju, miq të mij intelektualë e intelektuale që ju rreshket zemra në fejsbuk kur shihni të digjen disa kazanë plehrash, këtë veprim të shëmtuar për shkatërrimin rrënjësor të shoqërisë shqiptare – krijimin në shekullin e 21të të një sistemi që funksionon me parimet e sigurimit të shtetit enverist, kopjuar nga praktikat e KGB-së? Si mund t’iu duket kjo normale, në një shoqëri të qytetëruar, e legjitime në një shtet ligjor, e pranueshme për njerëzit e moralshëm dhe e justifikueshme për një intelektual?
Nuk po kërkoj të përgjigjeni për incerenatorët; as të shpjegoni se “ai”, idhulli juaj, është i kulluar dhe nuk ka marrë asnjë qindarkë nga betonizimi i vendit; nuk kam nevojë të më bindni se ka në zemër interesat e vendit në të gjitha pazarllëqet që bën me investitorët e huaj dhe shqiptarë; po iu kursej edhe përpjekjet për të arsyetuar se si i kanë rënë në burg dhe po bëhen gati të bijen për afera korruptive pjesa më e madhe e bashkëpunëtorëve të tij më të afërt, zëvendëskryeministrat, kryetarja e Shërbimit Informativ, kryetari i Bashkisë së Tiranës, Ministri i Brendshëm e Ministrja e Jashtme. Mbajini të gjitha për vete se ua kam falur. Vetëm përgjigjuni: Si mund t’ia justifikoni moralisht dhe intelektualisht poshtërsinë, pështirësinë, neverinë, fëlliqësinë e quajtur patronazhizëm?
Por mos më sillni argumentin e votave. Sepse mund të kesh mbështjen e nëntëdhjetë përqind të popullsisë kur ata braktisin normat fillestare morale dhe pajtohen me korrupsionin dhe me të keqen. Historia ka njohur plot raste të shoqërive që janë pajtuar me të keqen. Evropa ra njëmijë vjet në errësirë mesjetare pasi u pajtua me të keqen. Gjermania u pajtua me të keqen dhe solli shkatërrim. Rusia dhe pjesa lindore e kontinentit gjithashtu. Historia e vonëshme e vendit tonë e ka ende të freskët rastin e turpshëm të pajtimit të pjesës më të madhe të popullsisë me të keqen për gati gjysmë shekulli. Fakti që e voton shumica e një popullsie pa kurrfarë kulture demokratike nuk i jep kërkujt imunitet ligjor që të bëjë si të dojë dhe aq më pak i jep të drejtë morale të shkatërrojë shoqërinë.
Prandaj ju, miqtë e mij të dashur intelektualë, që i dilni në mbrojtje Edi Ramës dhe dhunës së tij, kokëfortësisë së tij për të mos dhënë dorëheqje; që skandalizoheni dhe revoltoheni nga veprimet e protestuesve, po patët një fije integriteti, bëni një koment këtu poshtë për të treguar arsyetimin tuaj moral në lidhje me mbështetjen që i jepni krijuesit të sistemit të patronazhistëve. Jepni një shpjegim të thjeshtë, ose të ndërlikuar për të më bindur që të mos i përkrah protestuesit që kërkojnë dorëheqjen e Ramës dhe vënien e tij përpara përgjegjësisë ligjore.
Nëse e bëni, unë jam gati t’i përgjigjem çdo pyetjeje që do t’iu vijë në mendje lidhur me qëndrimet dhe parapëlqimet e mija politike, ose me busullën time morale që më orjenton në shoqëri dhe politikë. Në fund të fundit, këtu jemi për të diskutuar dhe rrahur mendime.
