Shqiptari në Kanada fiton 1 milion dollarë në lotari

Një shqiptar në Kanada ka fituar një milion dollarë në shortin Lotto Max më 18 tetor.
Babai i tre fëmijëve, Gazmen Hashani nga Oliliqi i Kosovës, që jeton në Kanada, ka treguar se nuk mund ta besonte se ka fituar paratë dhe se e ka skanuar dy herë biletën.
Mediat kanadeze shkruajnë se shtetasi Gazmen Hashani fitoi çmimin e madh në shortin e 18 tetorit të Lotto Max.
“Bileta e fundit që kontrollova thoshte 1 milion dollar. Nuk mund ta besoja dhe e skanova edhe dy herë të tjera. Kur tha të njëjtën gjë, e futa shpejt biletën në xhep. Kur i thashë gruas se fitova 1 milion dollarë, ajo filloi të dridhej. Ajo ishte shumë e lumtur dhe e emocionuar për familjen tonë” tha ai.
Ai shtoi se ka në plan t’i përdorë paratë e fituara për të bërë një paradhënie për një shtëpi. “Trupi dhe mendja ime ndihen të qetë – një ndjenjë që nuk e kam përjetuar kurrë më parë”, tha ai.
Bileta fituese u ble në Ins Market në Kingsway Drive në Kitchener, shkruan CTV News.