By Tiranë – 98-vjetori i Mjekësisë Veterinare Shqiptare u shënua me një konferencë të nivelit të lartë, organizuar nga Urdhri Profesional i Mjekut Veterinar, duke vënë në qendër rolin thelbësor të veterinerëve në shëndetin publik, mirëqenien e kafshëve dhe sigurinë ushqimore.
Në fokus të këtij organizimi ishte angazhimi i fortë i Oli Peros, e njohur për përkushtimin e saj të vazhdueshëm ndaj mbrojtjes dhe mirëqenies së kafshëve. Përmes organizatës Animals Need Me dhe bashkëpunimeve të saj ndërkombëtare, ajo ka kontribuar aktivisht në promovimin e standardeve bashkëkohore të kujdesit veterinar në Shqipëri, duke ndërtuar ura profesionale mes Kanadasë dhe vendit tonë.
Falë këtij vizioni dhe këtij bashkëpunimi, konferenca mirëpriti dy lektore nga Kanadaja:
-Dr. Juliana Perez nga SPCA de Montréal, e cila mbajti një prezantim mbi Shelter Medicine – një disiplinë e specializuar që trajton menaxhimin shëndetësor në strehat publike dhe private për kafshë, një fushë thelbësore për realitetin shqiptar. Dr. Perez është ndër mjeket e para në Kanada që ka kryer trajnim të specializuar në SHBA pikërisht në këtë disiplinë.
-Dr. Giuliana Miguel Pacheco nga Humane Canada, e cila trajtoi temën e mirëqenies së kafshëve të fermës, duke theksuar standardet moderne të trajtimit, etikën profesionale dhe rëndësinë e harmonizimit me praktikat ndërkombëtare.
Pjesëmarrja e eksperteve nga Montreali përfaqëson një hap konkret drejt ndërkombëtarizimit të diskutimit profesional në Shqipëri, ndërsa përkthimi simultan garantoi një komunikim të plotë mes ekspertëve vendas dhe ndërkombëtarë.
Konferenca mblodhi përfaqësues nga Federata e Veterinerëve të Europës, Organizata Botërore e Veterinarisë, si dhe oda veterinare nga Kosova, Mali i Zi, Maqedonia e Veriut dhe Gjermania — duke e shndërruar këtë përvjetor në një platformë rajonale bashkëpunimi dhe shkëmbimi përvojash.
Në fjalën e saj, Oli Pero theksoi se mirëqenia e kafshëve është pjesë e drejtpërdrejtë e shëndetit publik dhe e përgjegjësisë sonë si shoqëri moderne, duke nënvizuar rëndësinë e sjelljes së ekspertizës ndërkombëtare për të ngritur standardet profesionale në Shqipëri.
98-vjetori i Mjekësisë Veterinare nuk ishte vetëm një përkujtim historik, por një dëshmi se profesioni veterinar sot kërkon vizion, bashkëpunim dhe integrim me praktikat më të avancuara globale — një mision që Oli Pero po e çon përpara me vendosmëri.
