By Boston – SHBA
“Noli Film Festival” është festivali i parë i filmit shqiptar në Boston, SHBA, që do të zhvillohet nga data 31 maj deri në 2 qershor në Katedralen Ortodokse Shqiptare të Shën Gjergjit. Ky festival do të prezantojë vlerat shqiptare te shoqëria amerikane dhe është unik sepse do të zhvillohet brenda një katedrale ku është e para herë në botë.
Erand Sojli, aktor dhe njëherësh producenti i festivalit mes intervistave mediatike shprehet se duke qenë se Noli, Kisha dhe libraria e tij janë simboli i shqiptarisë dhe integrimit në gjithë USA, dhe si një figurë multidimensionale me kontribute sociale artistike letrare deri ato muzikore, të drejton vetvetiu me një nisëm të tillë. Dhe cila gjini do mund të ishte më ideale për të përfaqësuar dhe eksportuar të gjitha këto vlera njëherazi përveç kinematografisë? Pra emri i festivalit është në habitatin e vet.
Festivali do të zgjasë 3 ditë mbështetet nga “Noli Libraria” dhe Qendra kulturore “Fan S Noli” të mbështetur nga organizata shqiptare e mjekëve kundër kancerit ALBANIAN FIGHTING CANCER për të cilët do të shkojnë dhe të gjitha dhurimet duke e bërë edhe më të rëndësishëm këtë festival i cili kategorizohet si një festival unik në bote pasi është i vetmi që zhvillohet në një katedrale. Organizatorët e festivalit janë “SojliArt Production” dhe Bujar Alimani nga 90 Production. Sigurisht me mbështetjen e pakursyer të vullnetarëve që me thënë të drejtën na kanë ndihmuar shumë.
Në një përzierje eklektike të filmit shqiptar, festivali do të paraqesë një gamë të gjerë filmash, duke përfshirë filma artistikë, dokumentarë, filma të shkurtër dhe filma të animuar. Në çdo fazë të festivalit, që fillon me një pritje të veçantë më 31 maj dhe përfundon me një gala përmbyllëse dhe ceremoni çmimesh më 2 qershor, pjesëmarrësit do të kenë mundësinë të shohin, diskutojnë dhe festojnë kinemanë shqiptare dhe trashëgiminë kulturore.
Në këtë festival, figura e shquar e historisë shqiptare, Fan S. Noli, do të nderohet dhe përkujtohet për kontributin e tij të shquar në letërsi, art dhe politikë. Filmat do të shfaqen në ambientet profesionale të Auditoriumit Athanas, duke ofruar një përvojë kinematografike për të gjithë pjesëmarrësit.
