By Nuk e di si duket Shqipëria nga dritarja e perëndimit. Ndoshta duket e ylbertë dhe ndoshta parë nga larg duket edhe si një tortë fëmijësh me një larmi lodrash të vendosura rrëmujshëm mbi kremin e tortës.
Nga dritarja e perëndimit, të lëçiturit shqiptarë që kanë ngritur jetën e tyre atje dhe mirë kanë bërë, teksa dalin në dritare dhe shohin tortën shumëngjyrëshe me emrin Shqipëri, nga larg zgjasin duart dhe ngjyejnë gishtin me pakëz krem torte dhe fillojnë të shprehen mbi cilësinë e kremit.
E në meditimin për cilësinë e kremit të lëçiturit e perëndimit quajnë “fletërrufe” një qëndresë kundrejt sjelljes aspak diplomatike të ambasadores Yuri Kim.
Nëse peticioni për ambasadoren Yuri Kim është “fletërrufe”, pohimi i saj se “ndërhyrja në drejtësi nuk është ndërhyrje, por nxitje për drejtësinë të bëjë gjënë e duhur”, çfarë është?!
Në cilën gjuhë të botës ndërhyrja është e barasvlershme me nxitjen?!
Nëse peticioni për ambasadoren Yuri Kim është “fletërrufe”, prania e saj e zgërdhirë pranë Veliajt në çdo festë, çfarë është?!
Nëse peticioni për ambasadoren Yuri Kim është “fletërrufe”, heshtja e saj kur Veliaj vetëshpallet si burri i vetëm me testikuj prej hekuri në qytet, që vë në lëvizje me një të rënë të lapsit institucionet e drejtësisë, çfarë është?! A mund të vihet Veliaj para drejtësisë për çështjen e inceneratorëve kur mbështillet sistematikisht nga prania e kadifenjtë e ambasadores?!
Nëse peticioni për ambasadoren Yuri Kim është “fletërrufe”, heshtja e saj kur Edi Rama e fyen publikisht duke e reduktuar në sekretare partie dhe duke pohuar se raporti i DASH- it është veç një copy paste, vit pas viti, çfarë është?!
Nëse peticioni për ambasadoren Yuri Kim është “fletërrufe”, kërcënimi i saj me ngrënie bari për demokratët, çfarë është?!
Ambasadorja ka të drejtën ta shfaqë publikisht njëanshmërinë e saj kudo, ndërsa shqiptarët që nënvizojnë këtë njëanshmëri akuzohen se përpilojnë një “fletërrufe”.
Sipas kësaj logjike, reagimi quhet fletërrufe dhe nënshtrimi quhet qytetari. Ku është parë e ku është dëgjuar një logjikë e tillë?!
Të lëçiturit e perëndimit, në pamundësi për të mbrojtur të pambrojtshmen, të kenë mirësinë mos na fyejnë shqisat dhe reagimin mos ta quajnë fletërrufe, pasi kjo logjikë bie poshtë veçse me një fjali të vetme- Kur një ambasadore shpall njëanshmërinë e saj publikisht, shqiptarët nuk mund ta shprehin kundërshtinë e tyre privatisht.
Post Scriptum- Ajo çka të lëçiturit e perëndimit quajnë krem torte nga larg, në të vërtetë është shëllirë djathi me të cilën ushqehen sistematikisht shqiptarët që jetojnë në Shqipëri. © SYRI.net
