By 
Sot, në Montreal, nuk u mblodhëm thjesht si shqiptarë. U mblodhëm si bij dhe bija të një kombi që Shqipërinë e mban në zemër, pavarësisht largësisë, kufijve apo kontinenteve.
Shqipëria nuk është thjesht një copë tokë në hartë. Shqipëria është historia jonë, kujtesa jonë kolektive, sakrifica e të parëve tanë dhe amaneti që kemi detyrimin t’ua lëmë brezave që vijnë.
Në një kohë kur në Shqipëri po zhvillohen debate të rëndësishme mbi investimet strategjike, zhvillimin ekonomik dhe të ardhmen e pasurive natyrore nga veriu në jug, ne kemi jo vetëm të drejtën, por edhe detyrimin qytetar të informohemi, të ngremë zërin dhe të kërkojmë që çdo vendim të jetë transparent, i përgjegjshëm dhe në interes të së mirës publike.
Edhe nga Montreali dhe Kanadaja, ne mbetemi pjesë e së njëjtës histori dhe të të njëjtit fat kombëtar. Distanca nuk e zbeh lidhjen me vendin tonë. Përkundrazi, shpesh ajo e bën më të fortë ndjenjën e përgjegjësisë ndaj tij.
Le të tregojmë se forca e një kombi nuk matet me numrin e banorëve, por me aftësinë për të mbrojtur vlerat e tij.
Kur ruajmë natyrën, ruajmë identitetin.
Kur mbrojmë trashëgiminë, mbrojmë kujtesën.
Kur kërkojmë llogari, mbrojmë të ardhmen.
Mesazhi i sotëm ishte i qartë: Ne e duam Shqipërinë. Ne respektojmë ligjin dhe demokracinë. Ne besojmë se Shqipëria u përket shqiptarëve të sotëm, por edhe brezave që do të vijnë nesër.
Sot, ne nuk ishim zëri i zemërimit. Ishim zëri i ndërgjegjes.
Dhe ky është zëri që duhet dëgjuar.
Blerina Ruka/ Albanian Montreal Press
