By Ottawa- Ontario
Në kuadër të javës së Kulturës së Kosovës dhe në vazhdën e gjithë aktiviteteve artistike në provincat kanadeze, nuk mund të mungonte ekspozita e artistit Zeqirja Rexhepi. Më ftesë nga Ambasada e Republikës së Kosovës në Ottawa, këtë herë pikturat e artistit nga Kosova udhëtuan nga Halifax për në kryeqytet, në nder të publikut artdashës apo edhe të ftuarve nga Kosova si zv.kryeministres dhe ministres së Punëve të Jashtme Donika Gërvalla.
Në Muzeun Kanadez të Luftës, piktori Rexhepi prezantoi koleksionin e veprave të tij të derdhura ne akrilik duke përshkruar edhe një herë disfatat e luftës së Kosovës, heronjtë si simbole, por edhe nota qetësie e pranvere pa harruar edhe figurën e femrës.
Zeqirja Rexhepi u lind në vitin 1955 në fshatin Përlepnicë të Gjilanit në Kosovë. Ai ekspozoi gjerësisht pikturat e tij në Kosovë dhe jashtë saj dhe u porosit si muralist për të krijuar murale për disa kisha dhe xhami. Ai është i autor edhe i veprës monumentale në Kishën e Shën Antonit në Binçë të Gjilanit “Martirët e Karadakut 1846 – 48”.
Gjatë luftës në Kosovë më 1999 Rexhepi me familjen e tij u largua nga Kosova, dhe ka qëndruar më shumë se një muaj në kamp refugjatësh në Maqedoni. Familja Rexhepi u bë pjesë e rreth shtatë mijë refugjatëve nga Kosova që shkuan në Kanada me ndihmën e qeverisë kanadeze.
Që nga mbërritja e tij në Kanada, ai nuk i është ndarë asnjë ditë profesionit dhe pasionit të tij të piktures, dhe gjatë gjithë kësaj kohe ka pasur shumë ekspozita personale dhe grupore, punimet e së cilit e kanë pasuruar skenën artistike jo vetëm në Kanada.
Pikturat e tij janë ekspozuar në Galerinë e Arteve të Universitetit Saint Mary, Pier 21, Galeria e Arteve Nova Scotia, Galeria e Muzeut të Aviacionit, Galeria e Arteve e Universitetit Dalhousie, etj. Piktori Rexhepi njihet edhe për bashkëpunimin e tij të frytshëm me Ambasadën e Shqipërisë dhe Kosovës në Ottawa, me Konsulatën e Përgjithshme të Kosovës në Toronto, si dhe me shoqatat e komunitetit shqiptar në gjithandej në Kanada në shumë aktivitete kombëtare e kulturore.
Nga Albanian Montreal Press
