By Mirela Kanini, një shkrimtare dhe sipërmarrëse e njohur shqiptare, ka fituar vëmendje të veçantë me librat e saj të suksesshëm dhe përkushtimin ndaj produkteve të kujdesit organik për lëkurën përmes kompanisë së saj, Riche Organics. E lindur dhe rritur në Shqipëri, ajo emigroi në SHBA në vitin 1996, duke nisur një kapitull të ri jetësor që është bërë burim frymëzimi për krijimtarinë dhe sipërmarrjet e saj.
Përballë vështirësive ekonomike dhe politike të viteve pas rënies së komunizmit, Mirela dhe familja e saj ndërmorën hapin e madh për të emigruar në Amerikë. “Ishte dashuri me shikim të parë,” kujton ajo për vendin që i dha një ndjesi sigurie dhe mundësinë për të ndjekur ëndrrat. Ky rrugëtim i vështirë, por shpresëdhënës, ka ndikuar thellë në veprat e saj letrare, duke sjellë histori të pasura me përjetime të emigrantëve dhe sfidat e tyre.
Suksesi i “The Sins of Mrs. Ema”
Libri i saj i fundit, The Sins of Mrs. Ema, ngjalli interes të madh në Shqipëri por u publikua edhe për tregun amerikan. Me një rrëfim prekës dhe universal mbi dilemat, forcat dhe dobësitë njerëzore, Ema, personazhi kryesor, reflekton sfidat dhe ambiciet e shumë grave. “Ema është një grua e fortë që përballet me të kaluarën e saj dhe përpiqet të gjejë rrugën drejt lumturisë. Shumë gra ndihen të lidhura me historinë e saj,” thotë Mirela.
Shoqata “Vatra” në Chicago
Mirela ka ndërtuar lidhje të forta me komunitetin shqiptar në SHBA, duke i dhënë rëndësi të madhe trashëgimisë kulturore. Ajo ndan se këto lidhje shpesh frymëzojnë historitë dhe personazhet në librat e saj. “Shkrimtari gjen histori kudo, dhe komuniteti im është një burim i pashtershëm frymëzimi,” shprehet ajo.
Riche Organics: Kujdesi etik për lëkurën
Pasioni i Mirelës për produkte organike lindi nga përvoja e saj personale në industrinë e bukurisë dhe puna e vajzës së saj me receta natyrale për trajtimin e ekzemës. Sot, Riche Organics është një markë e certifikuar nga PETA, e cila dallon për përkushtimin ndaj produkteve të sigurta, cilësore dhe të paeksperimentuara tek kafshët.
Duke balancuar letërsinë, sipërmarrjen dhe angazhimin me komunitetin, Mirela shikon drejt të ardhmes me ambicie dhe optimizëm. Synimi i saj është të përkthejë dhe publikojë të gjitha librat në anglisht dhe gjuhë të tjera, ndërkohë që Riche Organics vazhdon të zgjerohet në tregun online.
“Letërsia është pasioni im, ndërsa Riche Organics është një projekt që mbart shumë dashuri dhe përkushtim familjar,” përfundon ajo.
Nga Blerina Ruka/ Albanian Montreal Press
