By Kuvendi ka votuar këtë të mërkurë me 104 vota pro, 7 kundër dhe 3 abstenime shkarkimin e presidentit Ilir Meta.
Pas një seancë që zgjati më shumë se katër orë, Kuvendi për herë të parë në 30 vjet arriti të shkarkojë nga detyra kreun e shtetit ende pa mbaruar mandatin e tij.
Në seancë për të shkarkuar Presidentin e Republikës së Shqipërisë morën pjesë 114 deputetë. Pas vendimit, ka reaguar edhe zëdhënësi i Presidentit të Republikës, i cili thotë se veprimi i sotëm i Kuvendit është qesharak.
“Zero shqetësim nga vendimi antikushtetues dhe qesharak i landfillit parlamentar monist, që do të hyjë si rast studimor në historinë botërore të parlamentarizmit, se si një Kuvend pa opozitë, që edhe pse është shkarkuar me votë nga populli, voton për shkarkimin e një institucioni tjetër”, shkruan Tedi Blushi. Me një gjuhë të ashpër, që dukej se i drejtohet drejpërdrejt kryeministrit Rama, z. Blushi thotë se Presidentin e Republikës, Ilir Meta nuk e shqetësojnë aspak veprimet, që sipas tij po bëhen nga “tregtari i kufijve të Shqipërisë dhe të Kosovës, partnerët dhe vasalët e oligarkëve, mafia e inceneratorëve, grabitësit e votave, parave dhe të pronave të shqiptarëve”. Ai shton se kreu i shtetit është i motivuar për mbrojtjen e sovranitetit dhe integritetit të Shqipërisë.
Komisioni Hetimor Parlamentar i ngritur për të hetuar veprimtarinë e Presidentit Ilir Meta gjatë zgjedhjeve të 25 prillit i ka konsideruar “shkelje të rënda” qëndrimet dhe deklaratat e shprehura prej tij. Në raportin përfundimtar prej 96 faqesh, thuhet se “Presidenti shkeli 17 nene të Kushtetutës” dhe se “këto shkelje konsiderohen nga komisioni si shkelje të rënda”.
Ndërkohë, kreu i shtetit e ka cilësuar Kuvendin aktual “antikushtetues” dhe që nuk përfaqëson interesin e shqiptarëve.
Tashmë vulën finale për shkarkim ose jo të Presidentit e Republikës, Ilir Meta e ka në dorë Gjykata Kushtetuese, proces ky, i cili duket se do të marrë kohë. euronews.al
