By Në kuadër të shënimit të 25-vjetorit të Agjendës “Gratë, Paqja dhe Siguria”, Presidentja e Republikës së Kosovës, Vjosa Osmani, mirëpriti në Prishtinë delegacionin e Bordit Këshillues të Qeverisë britanike të Iniciativës për Parandalimin e Dhunës Seksuale gjatë Luftës. Në këtë takim morën pjesë të mbijetuar nga vende të ndryshme të botës, përfaqësues institucionalë dhe organizata ndërkombëtare të angazhuara në promovimin e paqes dhe drejtësisë gjinore.
Ndër pjesëmarrëset ishte edhe Venesa Sulimani, Drejtore dhe Ambasadore e Historive në The Artistè Foundation, e cila përfaqësoi organizatën në këtë forum të rëndësishëm ndërkombëtar. Sulimani ndau përvojën e Fondacionit në mbështetjen e grave dhe komuniteteve të prekura nga konfliktet, si dhe në fuqizimin e zërit të të mbijetuarve përmes artit dhe rrëfimit njerëzor.
Gjatë takimit, u theksua rëndësia e dëshmive personale të të mbijetuarve si themel për ndërtimin e politikave të qëndrueshme, që garantojnë drejtësi dhe mirëqenie të plotë për të gjithë. Pjesëmarrësit shkëmbyen ide dhe praktika të reja për bashkëpunim ndërkombëtar në fushën e parandalimit të dhunës seksuale gjatë luftës dhe pasojave të saj afatgjata.
Ky aktivitet u zhvillua në kuadër të punës së Qendrës Rajonale të Ekselencës për Gratë, Paqen dhe Sigurinë në Kosovë, dhe shënon vetëm fillimin e një sërë nismash që do të vazhdojnë të vënë në qendër të vëmendjes fuqizimin e të mbijetuarve dhe ndërtimin e paqes përmes drejtësisë dhe solidaritetit global.
