By Nga Shani Pnishi
Flamuri kombëtar shqiptar u ngrit dje para Parlamentit të Ontarios, duke vazhduar kështu traditën tashmë më shumë se dhjetëvjeçare të kësaj ceremonie. Sivjet aktiviteti u bë për nder të 109 vjetorit të Pavarësisë së Shqipërisë, dhe pesë vjetorit të miratimit të ligjit që shpalli muajin nëntor Muaji i Trashëgimisë Shqiptare në Ontario.
Në këtë ceremoni morën pjesë dhjetëra shqiptarë të cilët u përshëndetën nga anëtarë të Parlamentit dhe Qeverisë së Ontarios, përfaqësues nga trupi konsullor në këtë provincë, si edhe anëtarë të komunitetit dhe përfaqësues të shoqatave shqiptare që veprojnë në Ontario.
Duke pasur parasysh se jemi në kohë pandemie, ceremonia, ndryshe nga herët tjera, u zhvillua në ditë pune, dhe në përputhje me rekomandimet e Qeverisë së Ontarios për mospërhapjen e mëtejshme të virusit.
Në fjalën përshëndetëse, ambasadori shqiptar në Kanada z. Ermal Muça theksoi rolin e komunitetit shqiptar në thellimin e bashkëpunimit në mes Shqipërisë dhe Kanadasë në fusha të ndryshme, por edhe në ruajtjen dhe kultivimin e traditës sonë në Kanada përmes organizatave shumë aktive.
