By Nga Greta Gjinaj
Provinca kanadeze e British Columbia do të dekriminalizojë sasi të vogla të drogave të paligjshme për përdorim personal. Kështu ka njoftuar qeveria, në një masë të parë të këtij lloji në Kanada që synon të trajtojë krizën e opioideve.
Në një deklaratë të martën, qeveria e British Columbia tha se provincës i është dhënë një përjashtim tre-vjeçar nga statuti federal i kontrollit të drogës të Kanadasë, Akti i Drogave dhe Substancave të Kontrolluara.
Sipas qeverisë të rriturit e moshës 18 vjeç e lart, të cilët zotërojnë 2,5 gram (0,09 ons) të substancave të caktuara të paligjshme – duke përfshirë heroinën, fentanilin, kokainën, metamfetaminën dhe MDMA – për përdorim personal nuk do të arrestohen, akuzohen apo sekuestrohet droga e tyre.
Përjashtimi do të hyjë në fuqi më 31 janar 2023 dhe do të zgjasë deri më 31 janar 2026.
Kanadaja ka raportuar gati 27 mijë vdekje nga mbidozat e opioideve midis janarit 2016 dhe shtatorit 2021, sipas shifrave të qeverisë, ndërsa pandemia COVID-19 e ka përkeqësuar krizën.
Midis prillit 2020 dhe marsit 2021, vendi pa 7 mijë e 224 vdekje nga opioidet – një rritje prej 95 për qind krahasuar me të njëjtën periudhë të një viti më parë. Shumica e vdekjeve ndodhën në Alberta dhe Ontario.
Por punëtorët e reduktimit të dëmit dhe avokatët e dekriminalizimit të drogës thonë se përjashtimi i shpallur të martën nuk bën mjaftueshëm për të trajtuar një krizë mbarëkombëtare që ata argumentojnë se ka nevojë për veprim të menjëhershëm.
Në janar, Shëndeti Publik i Torontos kërkoi gjithashtu një përjashtim federal për të dekriminalizuar posedimin personal të drogave të paligjshme, duke përmendur një rritje “të paprecedentë” të vdekjeve të lidhura me opioidet.
Qyteti pa 551 vdekje të konfirmuara nga opioidet nga 1 korriku 2020 deri më 30 qershor 2021 – një rritje prej 57 për qind nga e njëjta periudhë e një viti më parë, tha agjencia shëndetësore.
“Kriminalizimi e bën të vështirë për njerëzit që përdorin drogë të kenë akses në shërbimet e reduktimit të dëmit, duke rritur rrezikun e lëndimeve, sëmundjeve dhe mbidozimit. Akoma më shumë, të dhënat kriminale e bëjnë të vështirë për njerëzit të gjejnë një punë dhe një vend për të jetuar, “tha ajo.
Ligjet aktuale të Kanadasë për drogën kanë rezultuar në kriminalizimin joproporcional të njerëzve me ngjyrë dhe indigjenë.
Ekspertë të tjerë të martën i kërkuan gjithashtu Kanadasë të zgjerojë dekriminalizimin e drogës. /Albanianpost.com
