By Nga sfidat e fillimit deri te sukseset e një emri të konsoliduar në tregun e Torontos, Diana Lika vjen si një nga historitë më inspiruese të diasporës shqiptare në Kanada. Me mbi 15 vite eksperiencë në një nga tregjet më të ashpra të real estate në Amerikën e Veriut, ajo ka ndërtuar një karrierë të bazuar në besim, profesionalizëm dhe rezultate konkrete.
E vlerësuar me çmime prestigjioze nga RE/MAX Canada dhe duke drejtuar sot një ekip të suksesshëm familjar, Diana Lika tregon në këtë intervistë për Albanian Montreal Press prapaskenat e suksesit, sfidat reale të tregut, gabimet që duhen shmangur nga blerësit dhe investitorët, si dhe rrugën e një gruaje shqiptare që ia ka dalë në një industri tepër konkurruese.
15 vite në tregun e Torontos nuk janë pak. A ka pasur ndonjë moment kur keni menduar të hiqnit dorë dhe çfarë ju ka rikthyer gjithmonë në lojë?
15 vitet në biznesin e shitje-blerjes së shtëpive kanë qenë një kënaqësi e madhe për mua, veçanërisht për vlerësimin maksimal që kam marrë nga klientët, të cilët më kanë vlerësuar për punën e kryer me ndershmëri dhe pasion. Gjithashtu kam marrë vlerësime të larta nga RE/MAX Canada, si: RE/MAX Hall of Fame, RE/MAX Platinum Award dhe të tjera.
Si në çdo biznes, fillimi është gjithmonë i vështirë. Sfida më e madhe në fillim ishte gjetja e klientëve, sepse duhet kohë që një agjent të krijojë një emër të besueshëm për njerëzit, të cilët po kryejnë ndoshta transaksionin më të madh të jetës së tyre; blerjen apo shitjen e shtëpisë.
Pasi klientela u rrit, sfida tjetër ishin orët e gjata të punës. Në këtë biznes nuk punohet vetëm 8 orë në ditë; shpesh puna fillon në mëngjes dhe vazhdon deri në orët e vona të mbrëmjes, duke punuar me oferta ose duke bërë kërkime në kompjuter. Koha për familjen shpesh është e kufizuar, sepse punojmë edhe fundjavave, kur klientët kanë mundësi të shohin shtëpitë dhe të marrin pjesë në open houses.
Kjo ka qenë arsyeja kryesore pse ndonjëherë kam menduar të heq dorë nga biznesi dhe t’i jap më shumë kohë familjes. Por familja ime ka qenë gjithmonë një mbështetje e madhe. Bashkëshorti dhe fëmijët më kanë ndihmuar shumë, dhe vajza ime Bessa dhe djali u përkushtuan aq shumë sa pas disa vitesh vazhduan studimet në college, morën licencën dhe sot punojmë së bashku si një ekip: LIKA TEAM.
Bessa është shumë e suksesshme dhe ka krijuar një emër shumë të mirë në komunitet dhe më gjerë. Për punën tonë kemi marrë disa vlerësime të rëndësishme, si:
- RE/MAX Lifetime Achievement (2025)
- RE/MAX Hall of Fame (2020)
- Chairman Award (2025)
- Titan Club (2024)
- RE/MAX Diamond (2023 & 2022)
- Titan Award (2021)
dhe shumë çmime të tjera çdo vit.
Tregu i Torontos është ndër më konkurruesit në Amerikën e Veriut. Cili është “sekreti” që ju ka mbajtur konkurruese për kaq gjatë?
Kur punon me ndershmëri dhe pasion, klientët e vlerësojnë këtë dhe të besojnë për vendime shumë të rëndësishme në jetën e tyre.
Kur klientët janë të kënaqur nga puna jonë, ata na referojnë te familjarët dhe miqtë e tyre. Kjo është mënyra më e mirë për të ndërtuar dhe për të rritur një biznes në këtë profesion.
Blerësit dhe investitorët shpesh bëjnë gabime të mëdha. Cili është gabimi më i shpeshtë dhe që do të donit ta thoshit publikisht: “Ju lutem, mos e bëni këtë më”?
Një nga gabimet që bëjnë shpesh blerësit dhe investitorët është të blejnë shtëpinë e dytë pa e shitur të parën, veçanërisht nëse kanë nevojë për fondet nga shitja e saj për blerjen e re.
Tregu në Ontario është i paparashikueshëm dhe kjo mund ta vendosë blerësin në një situatë shumë të vështirë financiare. Këshilla ime do të ishte: mos blini një shtëpi të dytë para se të keni finalizuar shitjen e së parës, nëse fondet e saj do të përdoren për blerjen e re.
A është e vështirë të afirmohesh si grua në real estate dhe a mendoni se keni pasur ndonjëherë presion ekstra vetëm pse jeni grua shqiptare në një treg kanadez?
Gruaja ka shumë role në jetë: të mbajë familjen, të rrisë fëmijët dhe të kujdeset për ta me përkushtim. Përveç këtyre, biznesi është një përgjegjësi tjetër e madhe që kërkon seriozitet dhe përkushtim.
Nuk është e lehtë të afirmohesh si grua në real estate, por asgjë nuk është e pamundur. Ka shumë agjentë shqiptarë që punojnë me përkushtim dhe kanë krijuar një emër shumë të mirë në komunitet, dhe mes nesh ekziston një bashkëpunim shumë i mirë. Nuk mund të them se kam ndjerë presion ekstra vetëm pse jam grua shqiptare në tregun kanadez, por në fillim ishte pak më e vështirë të fitohej besimi i klientëve kanadezë për shitjen apo blerjen e shtëpive të tyre. Sot, për fat të mirë, kemi fituar këtë besim dhe kjo nuk është më një sfidë.
A keni pasur klientë shqiptarë që ju kanë surprizuar; për mirë ose për keq? Na tregoni një situatë që nuk e harroni kurrë.
Çdo biznes ka surpriza. Ne i shërbejmë njerëzve që njohim, por edhe atyre që na referohen nga të tjerë. Surprizat më të bukura janë vlerësimet nga klientët dhe lumturia që shohim në sytë e tyre kur finalizohet blerja apo shitja e një shtëpie.
Një situatë që nuk do ta harroj kurrë ishte kur një nga klientët tanë do të merrte çelësat e shtëpisë pas një jave, por për dy ditë nuk po na përgjigjej në telefon. Pas shumë përpjekjesh arritëm të lidhemi me të dhe kuptuam se ndodhej në një situatë të vështirë.
Banka që kishte aprovuar mortgage-in vendosi të mos e jepte më atë, sepse në raportin e Equifax kishte një pagesë prej 50 dollarësh në collection, një faturë e harruar pasi ata kishin ndryshuar adresën.
Kjo mund të çonte në dështimin e blerjes së shtëpisë. Sapo morëm vesh situatën, i referuam te një bankë tjetër dhe arritëm ta zgjidhnim çështjen brenda disa ditësh. Në fund blerja u realizua me sukses, por ajo javë ishte shumë stresuese si për klientët, ashtu edhe për ne.
Tregu po ndryshon me shpejtësi. A do të jetë e ardhmja më e vështirë për blerësit apo po afrohet një moment i artë për investime?
Aktualisht është një moment shumë i mirë për blerësit dhe për ata që duan të investojnë. Ky është një treg që duhet shfrytëzuar nga investitorët dhe blerësit seriozë.
Nëse nesër do të ishit në Shqipëri me gjithë këtë eksperiencë kanadeze, cili do të ishte ndryshimi i parë që do të bënit në tregun shqiptar të real estate?
Gjëja e parë që më vjen në mendje është futja e teknologjisë moderne në sistemin e real estate, në mënyrë që agjentët, shitësit dhe blerësit të kenë më shumë informacion dhe transparencë në treg.
Një ndryshim tjetër shumë i rëndësishëm do të ishte licencimi i detyrueshëm i agjentëve të pasurive të paluajtshme. Agjentët duhet të ndjekin studime përkatëse dhe të kalojnë provime për të marrë licencën, ashtu siç ndodh në Kanada.
Bisedoi: Blerina Ruka/ Albanian Montreal Press
