By INSTAT: 20-29 vjeç u reduktua me 22 mijë banorë në një vit. Sociologu Dervishi: Në rrezik ekzistenca e shqiptarëve
Ritmet e tkurrjes së popullsisë janë të frikshme. Gjatë një vitit mosha 20-29 vjeç ka një reduktim me 22 mijë banorë.
Mosha që ka uljen më të madhe gjatë një viti është ajo 20-24 vjeç me15 mijë banore, pasuar nga grupmosha 25-29 vjeç me më shumë se 7 mijë banorë ndjekur nga të rinjtë 15-19 vjeç të cilët janë reduktuar me mbi 6 mijë. Sipas sociologut Zyhdi Dervishi, në shumë sektorë po ndihet mungesa e krahut të punës.
“Shoqëria shqiptare përjeton një tkurrje të rëndë por fatkeqësia më e madhe është se nuk po vetëdijësohet për të ardhmen e saj. Ka nevojë për stabilizim sepse në të ardhmen nuk do kemi mësues mjaftueshëm”.
Sipas sociologut shteti duhet të marrë masa për frenimin e emigracionit. INSTAT raporton se vetëm gjatë 2021 emigruan mbi 42 mijë banorë.
“Do vijë një moment që do ndryshojë struktura e popullsisë. Jo shqiptarët do jenë më shumë se shqiptarët dhe do vihet në diskutim emri i vendit. Kryesisht emigrojnë meshkujt dhe kjo do të thotë se ka më shumë vajza se djem në moshë martese”.
Braktisja e shumë zonave është shqetësuese ndaj për sociologun shteti duhet të frenojë mbipopullimin e rajonit, Tiranë-Durrës-Elbasan i cili ka mbi 53% të popullsisë totale.
“Zonat në Shqipëri që kanë resurse të mëdha janë braktisur. Duhen bërë politika afatgjata e strategjike që të mbajnë popullsinë në Shqipëri”.
Grupmosha që ka pësuar rritjen më të madhe sipas INSTAT janë të moshuarit mbi 65 vjeç, duke bërë që dhe mosha mesatare të jetë 38 vjeç.
