Dua Lipa bëhet zë i Kosovës: Na jepni një mundësi dhe ne do të shkëlqejmë

Dua Lipa bëhet zë i Kosovës: Na jepni një mundësi dhe ne do të shkëlqejmë

Me “Mirëmbrëma” i ka përshëndetur Dua Lipa të pranishmit në ceremoninë e ndarjes së Çmimit për Lidership të Dalluar nga Këshilli Atlantik, e krejt fjalimi qe një kapitull për anën e ndritshme për Kosovën. Tek ka shquar anën kreative të vendit të saj, në fjalim, s’ka harruar as kërkesën për liberalizim vizash për kosovarët, ka promovuar edhe “Zgjoin” drejt “Oscars”, por jo vetëm. “Krejt çka mund të them është na jepni një mundësi dhe ne do të shkëlqejmë”, ka thënë Lipa

Është e vendosur për të arritur suksese. Triumfet e saj nuk kanë të ndalur. Dua Lipa e ka të qartë imazhin e së ardhmes së saj e pjesë e identitetit të saj janë edhe rrënjët kosovare. Një ambasadore tipike e vendit. E tillë, që bën gjithë botën të kthejnë sytë nga vendlindja e saj sa herë që i jepet mundësia për të biseduar. Këngëtarja me famë botërore në paraqitjen e saj të fundit në Këshillin Atlantik, këtë detyrë sikur e ka marrë më një pjekuri akoma më të madhe. Me fjalimin e saj, Lipa të mërkurën mbrëma në Washington, dha mesazhet e një intelektualeje, politikane, avokuese e të drejtave të njerëzve duke përdorur sharmin e saj si artiste me nam.

Fuqia e një ylli për ngritjen e vendlindjes

Këshilli Atlantik, duke marrë parasysh ngritjet dhe uljet e shumta të këtij viti – një rikuperim i pabarabartë i pandemisë, arritjet dhe pengesat për demokracitë në mbarë botën – ka vendosur që t’i nderojë ata që kanë ndihmuar në progres dhe në stabilitet në kohë të trazuara.

Ky ishte qëllimi edhe i ndarjes së Çmimit për Lidership të Dalluar (DLA) të mërkurën në “Mellon Auditorium”, ku u nderuan Ursula von der Leyen, Albert Bourla, Özlem Türeci, Ugur Sahin dhe Dua Lipa.

Vetë Këshilli përmes komunikatave të tyre tregoi edhe arsyet. Bëri të ditur se gjatë një kohe të mosmarrëveshjeve të mëdha globale, presidentja e Komisionit Evropian, Ursula von der Leyen, ka shfaqur një përkushtim të jashtëzakonshëm për ruajtjen e lidhjeve transatlantike. E në mes të krizës më të rëndë të shëndetit publik, që bota nuk ka pasur qe një shekull, udhëheqësi i “Pfizerit”, Albert Bourla, së bashku me bashkëthemeluesit e “BioNTech”, Özlem Türeci dhe Ugur Sahin, kanë treguar në mënyrën më të mirë sesi bizneset mund t’i ndihmojnë shoqërisë. Ndërkohë, për fituesen e Çmimit “Grammy”, Dua Lipa, Këshilli ka theksuar se ajo ka përdorur fuqinë e saj si një yll botëror për të ngritur vendlindjen e të parëve të saj, Kosovën nga varfëria e pasluftës duke ngjallur shpresë te një brez i tërë.

Të mërkurën, kur u festua përvjetori i 60-të i Këshillit Atlantik, presidenti i organizatës, Frederick Kempe, u kthye në momentin e themelimit – kur administrata e re e Kennedyt u testua nga Bashkimi Sovjetik. Ai vuri në dukje se ka paralele të forta midis rrethanave të jashtëzakonshme në të cilat u themelua Këshilli dhe sfidave të sotme, të cilat variojnë nga pandemia te ndryshimet klimatike e deri te konkurrenca me Kinën.

“Kjo është arsyeja pse ne jemi të gjithë këtu së bashku, të kuptojmë që imperativi historik i kohës sonë është po aq i rëndësishëm si ai në kohën e themelimit tonë – dhe ndoshta edhe më i madh”, ka thënë Kempe të mërkurën.

“Ne jemi një mundësi dhe ne do të shkëlqejmë”

Lipa nisi fjalimin e saj, duke falënderuar Këshillin Atlantik si një mik i madh i Kosovës dhe duke theksuar se është nder për të për të festuar së bashku përvjetorin e 60-të. Pasi që falënderoi Bourlan, Türecin dhe Sahinin për gjithçka që kanë bërë gjatë kësaj kohë pandemike, Lipa duke buzëqeshur falënderoi Von der Leyenin, dhe i kërkoi falje për netët pa gjumë që vendi tjetër i saj, Britania, “ia ka shkaktuar gjatë këtyre negociatave të gjata dhe të dhimbshme për Brexit”.

Lipa ka thënë se ajo flet para tyre si një fëmijë i Kosovës që u lind dhe u rrit në Mbretërinë e Bashkuar, gjersa ka potencuar se është aty si mysafire e Shteteve të Bashkuara.

“Unë vij nga një vend për të cilin shumica prej jush do të keni dëgjuar, por ndoshta jo në mënyrën se si do ta përshkruaj. Dua të ndaj me ju pak gjëra për Kosovën time. Kosovarëve u pëlqen të festojnë, gjë që ndoshta nuk është befasi, pasi 50 për qind e popullsisë është nën njëzet e pesë vjeç”, ka thënë ajo duke shtuar me shaka se zyrtarisht është e moshuar në Kosovë. Ka potencuar edhe kulturën e vendit për të pirë kafe.

“Si një vend i vogël, Kosova është duke shpërthyer me kreativitet dhe kam shumë shembuj, por po i përmend vetëm disa. ‘Zgjoi’, një film i bukur kosovar, fitoi tre çmime kryesore në edicionin e sivjetmë të ‘Sundance’. Mbajeni atë në mendje kur flasim për ‘Oscars’”, ka thënë ajo gjersa ka treguar se Prishtina është edhe nikoqire e “Manifestas” vitin e ardhshëm, e që siç ka thënë ajo do ta mbushë qytetin me ekspozita dhe instalacione arti. E po ashtu me një buzëqeshje ka treguar se madje edhe gazetarët më me nam spekulojnë mbi atë se çfarë ka në ujin e vendit që sjell artistë muzikorë kaq të suksesshëm.

“Krejt çka mund të them është na jepni një mundësi dhe ne do të shkëlqejmë”, ka thënë Lipa.

Lobimi për anëtarësim të vendit në BE

Më pas Lipa ka theksuar se në vitin 2018, ajo dhe babai i saj themeluan festivalin “Sunny Hill” e që shpejt u bë një nga festivalet më të mëdha të muzikës në rajon. Ka treguar se ishte ëndërr e tyre që fansat t’i shohin grupet e tyre të preferuara, por edhe që artistët që bëhen pjesë e Festivalit të shohin skenën muzikore të shkëlqyeshme dhe të larmishme që ka vendi. Tutje ka thënë se ëndrra e tyre tjetër shpejt do të bëhet realitet: ndërtimi i qendrës së “Sunny Hill Foundation”. Ka treguar se ajo do të jetë një hapësirë ​​kreative ku të rinjtë mund të mësojnë për produksionin muzikor dhe performancat.

“Për ata që dëshirojnë të depërtojnë në industri, do të ketë punëtori të organizuara nga artistë dhe producentë nga e gjithë bota të cilët do të ndajnë atë që kanë mësuar. Dhe për të tjerët, qendra do të jetë një vend ku do të mësojnë që të kenë besim në vete, të mësojnë aftësi të reja dhe më e rëndësishmja nga të gjitha, për t’u argëtuar”, ka thënë ajo.

Ka treguar për koncertin e saj të parë në Prishtinë, ishte 13-vjecare dhe kishin performuar Method Man dhe Redman. Ka theksuar se nuk kishte shumë mundësi për të zgjedhur.

“Kosova është një treg shumë i vogël për t’u përfshirë në shumicën e turneve botërore. Kështu që tani ne sjellim artistë në Kosovë. Dhe pa përjashtim, të gjithë ata që kemi ftuar të performojnë në festivalin ‘Sunny Hill’, nga Miley Cyrus te Calvin Harris, janë mahnitur nga e gjithë përvoja”, ka thënë ajo.

Ka shtuar se megjithatë, imazhet shpesh mund të jenë mashtruese gjersa ka theksuar se në shumë mënyra, jeta në Kosovë është e vështirë dhe brenda saj vërehen plagët e viteve të luftës. Madje, ka thënë se ajo vërehet edhe tek ata që i shpëtuan më lehtë luftës.

Lipa ka shtuar se për të, fakti se ka këtë identitet të dyfishtë ka qenë diçka pozitive. Ajo ka treguar se Kosova ende përballet me shumë sfida, dhe shpesh është brezi i ri ai që i bart mbi vete ato.

“Të rinjtë luftojnë për të gjetur punë dhe mundësitë e tyre pengohen nga kufizimet që e bëjnë të vështirë udhëtimin për punë ose kënaqësi. Pasi kemi përmbushur të gjitha kriteret, Komisioni Evropian në fakt ka rekomanduar liberalizimin e vizave për Kosovën, për më shumë se tre vjet më parë. Pra, a mendoni se ne mund ta bëjmë atë tani? Ose…”, ka thënë Lipa.

Dua Lipa

Ka treguar se vendi ka vetëm trembëdhjetë vjet pavarësi. “Si pjesë e një komuniteti të fortë ndërkombëtar, ne do të lulëzojmë emocionalisht, ne do të lulëzojmë ekonomikisht dhe kulturalisht. Është në ADN-në tonë”, ka thënë ajo.

Lipa më pas, duke treguar se akoma i dhemb që Mbretëria e Bashkuar zgjodhi të largohej nga Bashkimi Evropian, ka thënë se në vend që të ndalet te kjo dëshiron të kujtoj se qëllimi i parë i BE-së është të sigurojë paqen përmes unitetit.

“A nuk do të ishte e përshtatshme nëse Kosova mund të zinte vendin e saj brenda atij bashkimi paqësor, të lulëzonte ekonomikisht përkrah fqinjëve tanë dhe të shëronte lëndimin e konfliktit të fundit? Me këtë vizion në mendje, e pranoj këtë çmim me mirënjohje për të gjithë të rinjtë e Kosovës”, ka thënë Lipa, gjersa për ta marrë atë në emër të tyre ka ftuar në skenë presidenten e Kosovës, Vjosa Osmani.

Presidentja Osmani: “Me fjalët e Duas, ne kemi rregulla të reja”

Presidentja Osmani me të marrë fjalën ka theksuar se Lipa ka një zë të lartë jo vetëm sa i përket kapacitetit të saj vokal, por edhe për faktin se ajo është një avokuese e jashtëzakonshme për gratë, e patrembur nga çështjet politike dhe një kampione e pamposhtur për vendin e saj, Republikën e Kosovës dhe njerëzit e saj. Edhe Osmani po ashtu ka potencuar se vendi, por edhe njerëzit do të vazhdojnë të fortësojnë shtetësinë e Kosovës dhe do të japin kontribut në komunitetin ndërkombëtar, për paqen dhe stabilitetin në rajon.

“Ne do t’i bëjmë të gjitha këto, sepse kjo është ajo që meriton populli ynë… Dhe ne do të vazhdojmë të mbrojmë lirinë dhe të drejtën tonë për të ekzistuar si një vend i pavarur dhe sovran. Dhe për ata që përpiqen të na eliminojnë dritat, kam një mesazh për ta. Ata nuk janë në këtë dhomë, natyrisht. Me fjalët e Duas, ne kemi rregulla të reja. Populli i Kosovës dhe lidershipi i saj me asnjë çmim nuk do të heqin dorë nga e drejta e vendit tonë për të ekzistuar. Dhe ne do të jemi absolutisht të zëshëm për të kërkuar drejtësinë dhe rrugën e merituar për popullin tonë”, ka thënë Osmani.

Ka shtuar se e ardhmja e Kosovës është brenda strukturave euroatlantike gjersa ka theksuar se i bashkohet zërit të Dua Lipës për t’u bërë thirrje vendeve anëtare të BE-së që të përmbushin premtimin e vonuar për liberalizimin e vizave për qytetarët e Republikës së Kosovës.

Në anën tjetër, presidentja e Komisionit Evropian, Ursula von der Leyen, ka thënë se ky vit u ka rikujtuar se duhet mbrojtur demokracia çdo ditë. Gjersa Albert Bourla ka potencuar se për të mposhtur virusin njerëzit duhet të jenë të bashkuar. Në anën tjetër, Türeci ka treguar se sekreti i suksesit të tyre ishte të pasurit e një grupi miqsh që ishin fokusuar për të përdorur inteligjencën e tyre shkencore për ta ndihmuar njerëzimin.

Kurse Ugur Sahin ka thënë se dëshira për t’i ndihmuar të tjerët është e lidhur dhe e koduar në gjenet tona.

“Ose mund të thuash gjithashtu në mARN-në tonë. Këto gjene nuk janë gjithmonë aktive. Ato shpesh kanë nevojë për një shkas për t’u aktivizuar – një frymëzim, një shembull, dikë që të bëjë hapin e parë”, ka thënë ai.

Kështu të nderuarit e Këshilli Atlantik të këtij viti kanë vërtetuar se përparimet e mëdha dhe sukseset janë të mundshme edhe kur rruga përpara duket e frikshme dhe është me pengesa.

Këshilli Atlantik, si organizatë jopartiake, promovon udhëheqje konstruktive dhe angazhimin në çështjet ndërkombëtare bazuar në rolin qendror të Komunitetit Atlantik në ballafaqimin e sfidave globale. Këshilli ofron një forum thelbësor për navigimin e ndryshimeve dramatike ekonomike dhe politike që përcaktojnë shekullin XXI, duke informuar dhe nxitur rrjetin e tij të liderëve globalë. Nëpërmjet ngjarjeve, publikimeve, ideve që gjeneron, liderëve të ardhshëm që zhvillon dhe komuniteteve që ndërton – formëson strategjitë dhe zgjedhjet politike për të krijuar një botë më demokratike, më të sigurt dhe më të begatë.

Galangjarja në “Mellon Auditorium” në Ëashington u transmetua online në gjithë botën dhe Lipa ktheu edhe njëherë vëmendjen e mediave nga vendi i saj, një ditë pasi që bëri bujë me prezencën e saj në Ëashington për të shikuar filmin “Zgjoi” – kandidatin e Kosovës për “Oscars”.

administrator

Related Articles

Leave a Reply

Your email address will not be published. Required fields are marked *