By Me synimin për të forcuar përfaqësimin, bashkëpunimin dhe besimin mes komunitetit shqiptar dhe institucioneve të sigurisë në Kanada, është themeluar së fundmi Albanian-Canadian Law Enforcement Association (ACLEA), shoqata e parë e këtij lloji për profesionistët shqiptaro-kanadezë të zbatimit të ligjit.
Në krye të kësaj nisme qëndron Besnik Dobreci, i cili, i frymëzuar nga përvoja amerikane dhe nevojat konkrete të diasporës shqiptare në Kanada, ka ndërmarrë një hap të rëndësishëm drejt krijimit të një rrjeti kombëtar mbështetës për oficerët dhe punonjësit e sigurisë publike me prejardhje shqiptare.
Në këtë intervistë, ai flet për motivimin, misionin, vizionin dhe pritshmëritë nga kjo shoqatë, si dhe për rolin e saj në ndërtimin e urave të besimit mes komunitetit dhe institucioneve shtetërore.
Si lindi ideja për krijimin e Albanian-Canadian Law Enforcement Association dhe çfarë ju motivoi ta nisni këtë nismë në Kanada?
Në fillim të vitit 2025, nisa të ndjek në rrjetet sociale Shoqatën Shqiptaro-Amerikane të Zbatimit të Ligjit (AALEA). Menjëherë u impresionova jo vetëm nga vlerat që përfaqëson kjo organizatë, por edhe nga angazhimi i saj i gjerë filantropik në Shtetet e Bashkuara, si dhe në Kosovë dhe Shqipëri.
E themeluar në vitin 2019, AALEA përfaqëson dhe mbështet profesionistët shqiptaro-amerikanë të zbatimit të ligjit, duke shërbyer njëkohësisht si një urë e rëndësishme lidhëse ndërmjet agjencive të zbatimit të ligjit dhe komunitetit shqiptaro-amerikan. Misioni i saj përqendrohet në mentorim, zhvillim profesional, ndërgjegjësim kulturor dhe angazhim komunitar.
Në tetor të vitit të kaluar, mora pjesë në aktivitetin tim të parë të AALEA-s në Nju Jork, me ftesë të mikut tim Elton Shametaj. Pikërisht aty lindi ideja për krijimin e një shoqate për zyrtarët shqiptaro-kanadezë të zbatimit të ligjit. Fillimisht isha i shqetësuar për ta ndërmarrë këtë hap, pasi njihja vetëm katër zyrtarë të tjerë me prejardhje shqiptare në gjithë Kanadanë. Sot, me krenari mund të them se ajo ide është shndërruar në dhjetëra anëtarë në mbarë vendin. Në shkurt, në Toronto, në kuadër të Ditës së Pavarësisë së Kosovës, do të realizojmë hapjen zyrtare të shoqatës.
Motivimi im kryesor ka qenë ndërtimi i një rrjeti të fortë dhe mbështetës për profesionistët shqiptaro-kanadezë të zbatimit të ligjit, si dhe inkurajimi i të rinjve shqiptarë që të konsiderojnë këtë profesion fisnik.
Cili është misioni kryesor i shoqatës?
Ne jemi një shoqatë kombëtare jofitimprurëse, e ndërtuar mbi besimin se shërbimi dhe komuniteti ecin dorë për dore.
Duke bashkuar kanadezë me prejardhje shqiptare që shërbejnë në zbatimin e ligjit dhe sigurinë publike, ne synojmë të forcojmë besimin, të festojmë trashëgiminë kulturore dhe të kontribuojmë në komunitete më të sigurta dhe më të bashkuara.
Kush mund të bëhet anëtar dhe sa i madh ka qenë interesimi?
Ne kemi tre kategori anëtarësh:
- Anëtarë aktivë – profesionistë të betuar në zbatimin e ligjit
- Anëtarë të asociuar – punonjës civilë në agjencitë e sigurisë
- Anëtarë nderi – persona të pensionuar ose mbështetës të shquar
Interesimi ka qenë i jashtëzakonshëm. Fillimisht nisëm me pesë anëtarë në British Columbia, ndërsa sot kemi dhjetëra anëtarë nga e gjithë Kanadaja.
Çfarë pritshmërish keni nga lançimi zyrtar në Toronto?
Më 14 shkurt, me mbështetjen e Konsullit të Përgjithshëm të Kosovës, z. Kadri Dakaj, do të shënojmë hapjen zyrtare të shoqatës. Ky është një moment historik për komunitetin tonë dhe presim që të frymëzojë brezin e ri drejt karrierave në shërbimin publik.
Si zhvillohet bashkëpunimi me AALEA-n?
Ne jemi një shoqatë e pavarur, por e lidhur ngushtë me AALEA-n. Ndajmë të njëjtat vlera, mision dhe përkushtim. Partneriteti ynë bazohet në respekt, besim dhe qëllim të përbashkët.
Çfarë roli luan shoqata në lidhjen me komunitetin?
Ne synojmë të ndërtojmë ura besimi mes komunitetit shqiptar dhe institucioneve të sigurisë. Duke marrë parasysh përvojat e vështira historike të shumë familjeve shqiptare, ne punojmë për të ndryshuar perceptimet dhe për të ndërtuar mirëkuptim të ndërsjellë.
Cili është vizioni juaj afatgjatë?
Vizioni im është krijimi i një rrjeti global të profesionistëve shqiptarë në zbatimin e ligjit. Suksesi do të matet përmes rritjes së përfaqësimit dhe avancimit të anëtarëve tanë në role udhëheqëse. Nëse qëndrojmë të bashkuar dhe të përkushtuar, nuk ka kufij për atë që mund të arrijmë.
Përgatiti: Blerina Ruka/Albanian Montreal Press
