By Rusia nisi sulmin ndaj Ukrainës mëngjesin e kësaj të enjteje. Teksa presidenti rus, Vladimir Putin, njoftoi sot në mëngjes operacionin e gjerë ushtarak në Ukrainë, me sulme ajrore kundër qyteteve pranë Kiveit, Rusia ka rrethuar ushtarakisht Ukrainën në tre anë. Në Kiev janë dëgjuar sirenat e alarmit, duke paralajmëruar për një sulm të mundshëm ajror.
Qeveria e Kievit u ka kërkuar banorëve të gjejnë streha nëntokësore. Të enjten në mëngjes, sirenat e sulmit ajror u dëgjuan në qytetin perëndimor të Ukrainës, Lviv, për herë të parë që nga Lufta e Dytë Botërore. Qeveria e Ukrainës doli menjëherë në deklaratë kur tanket dhe trupat ruse kaluan përtej kufirit.
Vendet evropiane dhe Shtetet e Bashkuara kanë filluar të vendosin sanksione në përgjigje të veprimeve të Rusisë. Një vorbull përpjekjesh diplomatike në javët e fundit deri më tani nuk ka arritur të qetësojë tensionet në rajon.
Tensioni është i lartë në rajon pasi fill pas urdhrit për pushtimin e Ukrainës, Putini kërcënoi edhe Perëndimin duke i thënë që të rrinte jashtë këtij konflikti. Përshkallëzimi në konfliktin shumëvjeçar ka shkaktuar krizën më të madhe të sigurisë në kontinentin evropian që nga Lufta e Ftohtë, duke ngritur spektrin e një përballjeje të rrezikshme midis fuqive perëndimore dhe Moskës.
Ndërhyrja e Rusisë erdhi vetëm disa ditë pasi ajo njohu dy enklavat e kontrolluara nga separatistët në Ukrainën lindore, duke shkaktuar dënimin ndërkombëtar dhe kërcënimet për sanksione më të ashpra ndaj Moskës.
Në muajt e fundit Rusia kishte grumbulluar mbi 100 mijë trupa rreth Ukrainës, por presidenti Vladimir Putin në mënyrë të përsëritur kishte mohuar se ka ndonjë qëllim për ndërhyrje ushtarake.
Deri më tani situata është e paqartë në terren. Mediat ndërkombëtare raportojnë për viktima të shumta në radhët e civilëve prej sulmeve ruse në Kharkiv, ndërkohë autoritetet ukrainase bëjnë me dije se rusët kanë marrë një qytezë pranë Keivit përmes sulmeve me helikopter.
Presidenti i Ukrainës, Volodymr Zelensky thotë se forcat e armatosura të vendit të tij po zmbrapsin sulmet në zonën e Donbasit të Ukrainës lindore, si dhe në pjesë të tjera të vendit. Në të kundërt, Rusia thotë se ka hasur pak rezistencë.
Ushtria ukrainase thotë se ka vrarë rreth 50 “pushtues” rusë dhe ka rrëzuar të paktën gjashtë avionë rusë, megjithëse kjo nuk është verifikuar në mënyrë të pavarur.
Sipas CNN
