Diaspora dhe perandoria e rërës- Nga Nador Bakalli

Toronto- Kanada
Cdo gjë filloi në vitin 2016! Zell i madh! Entuziazmi në qiell! Rëra hidhet përpjetë.
Samiti i parë i Diasporës, 800 vetë nga 40 shtete të ndryshme. Krijohet “Ministri i Shtetit Për Diasporën”. Samiti i dytë I Diasporës, butafori pa fund. Shpenzime marramendëse. Tituj ambasador kombi lart e poshtë, krijimi i KKD, Agjensia e Diasporës, Dhoma e Biznesit të Diasporës, Komiteti Shtetëror Për Diasporën, Fondi Shqiptar Për Zhvillimin e Diasporës, Qendra e Botimeve Për Diasporën, Qendra e kësaj, e asaj, organizma, borde, agjenci, mbledhje, grupe pune, drejtori, sekratariate etj etj. Tre strategji të Diasporës.
Mijëra faqe me bojna të shumllojshme. Miliona Euro të shpenzuara. Ziente Diaspora si kurrë më parë. Themelet e perandorisë ishin rrënjosur aq fort sa do t’i rezistonin mijëvjecarit, si vetë rilindja.Por, me kohën del dhe boja si duket. Gjendja sot ne 2022? Kollaj fare. Perandori prej rëre e shembur me turp. U shkërmoq me themel. Ministria e Punëve të Kota u shkri. Agjencitë u shkrinë ose janë rrugës drejt shkrirjes. Askush nuk kërkoi falje për premtimet e pambajtura. Askush nuk kerkoi llogari se ku shkuan milionat e Eurove që u shpenzuan. Kali i betejës, Vota e Diasporës sot është marrë përsipër nga të tjerë. Ministria e Punëve të Kota, edhe Votën e Diasporës, si shumë gjëra të tjera, e la në mes të katër rrugëve.Ndërkohë që Diaspora fryhet (minimalisht 500 mijë të ikur në 10 vitet e fundit), strukturat qeveritare kinse për Diasporën, shfryhen dhe shkërmoqen njëra pas tjetrës. Diaspora, deri dje fëmija më i dashur dhe i përkëdhelur për qeverinë e rilindjes, sot e gjen veten jetime dhe në mes të katër rrugëve.
Gjithë ato fonde, angazhime, organizime dhe njerëz, u shkrinë në një hic! Le të na shërbejë si mësim kjo të nderuar miq. Cdo “Diasporë” e organizuar nga qeveria është vecse një flluskë dhe një gënjeshtër, pre e së cilës ranë të gjithë ata që menduan se Rama vërtetë e ka për zemër Diasporën. Jo, nuk e ka hic për zemër. Diaspora është kërcënimi më i madh për të paudhin. Është ajo që, herët ose vonë, do të sjellë fundin e tij dhe të cdo autokrati që do të mundohet ta pasojë. Të gjithë ju që besuat se Diaspora e organizuar e qeverisë është rruga e duhur, hidhini një vështrim vetes në pasqyrë dhe gjithashtu perandorisë së rërës së shkërmoqur që keni përballë. Vetëm një Diasporë me marrëdhënie sa më të distancuara nga qeveria do ta nxjerrë vendin nga bataku ku ndodhet. Cdo Diasporë e organizuar nga qeveria është ose do të kthehet pashmangshmërisht në vegël të përdorur të qeverisë.
Iluzioni i autonomisë nuk pin më ujë. Ne Tironcit kemi një shprehje: “Qe nji llafe, e múr (mori) ustai”. Mrekullitë e Diasporës ishin vec të tilla, llogje. I tha dhe i múr ustai autokrat.