By Polonia është në zi pas një prej sulmeve më të rënda me armë të regjistruara në vend. Gjashtë persona u vranë dhe 16 të tjerë u plagosën pasi një 24-vjeçar polak hapi zjarr ndaj njerëzve në sheshin kryesor të Krakovës, një prej zonave më të frekuentuara turistike të qytetit.
Ngjarja ndodhi të shtunën rreth orës 15:00. I riu hyri me makinë në sheshin kryesor të Krakovës, i maskuar dhe i veshur me veshje të stilit ushtarak, përfshirë jelek antiplumb, dhe nisi të qëllonte në mënyrë të rastësishme ndaj kalimtarëve. Mes viktimave janë katër gra dhe dy burra. Një prej tyre ishte shtetas britanik.
Autori, i identifikuar në mediat polake si Michał O., është shtetas polak dhe nga qyteti Ostrowiec Świętokrzyski. Ai nuk kishte precedent penal dhe nuk ishte i njohur më parë për policinë. Kishte licencë për armë zjarri dhe dyshohet se përdori një armë gjysmëautomatike të ngjashme me një AR-15.
Pas të shtënave, autori u përball me policinë. Dy efektivë u plagosën gjatë shkëmbimit të zjarrit, ndërsa 24-vjeçari u qëllua, u plagos rëndë dhe u arrestua. Aktualisht ndodhet në spital në gjendje kritike. Autoritetet vlerësojnë se ndërhyrja e shpejtë e policisë mund të ketë parandaluar një numër edhe më të madh viktimash.
Por hetimi mori një kthesë edhe më tronditëse. Në banesën e familjes së autorit, në Ostrowiec Świętokrzyski, policia gjeti trupat e tre personave: babait 53-vjeçar, nënës 52-vjeçare dhe motrës 21-vjeçare. Ata dyshohet se janë vrarë me armë zjarri. Në banesë u sekuestruan edhe armë të tjera.
Autoritetet po hetojnë motivin e masakrës. Ministri i Brendshëm Marcin Kierwiński tha se autori dukej se kishte pikëpamje shumë radikale dhe ishte i fascinuar nga ideologjitë e ekstremit të djathtë, ndërsa kryeministri Donald Tusk e ka cilësuar sulmin si akt terrorizmi. Megjithatë, motivi përfundimtar ende nuk është përcaktuar nga hetuesit.
Sulmi ka tronditur rëndë Poloninë, një vend ku ngjarje të tilla masive me armë janë jashtëzakonisht të rralla. Presidenti Karol Nawrocki ka shpallur dy ditë zie kombëtare, ndërsa në Krakov sheshi ku ndodhi masakra është mbyllur dhe qytetarët kanë nisur të vendosin qirinj në kujtim të viktimave.
Hetimet vijojnë për të zbardhur se çfarë e shtyu 24-vjeçarin drejt këtij sulmi dhe nëse vrasja e familjarëve të tij ka lidhje të drejtpërdrejtë me masakrën në qendër të Krakovës.
