By Hado: Prej Gushtit hyn në fuqi njohja reciproke e pensioneve mes dy vendeve
Finalizimi i marrëveshjes për njohjen reciproke të Sigurimeve Shoqërore mes Shqipërisë dhe Kanadasë i shërben mbi 20 mijë shtetasve shqiptarë. Sipas Drejtorit të Institutit të Sigurimeve Shoqërore, Astrit Hado vendimi hyn në fuqi në Gusht.
“Janë mbi 20 mijë shqiptarë në Kanada që përfitojnë. Negociatat kanë zgjatur rreth 2 vite dhe do të hyjnë në fuqi në Gusht”.
Sipas Hados marrëveshja është korrekte mes Shqipërisë dhe Kanadasë dhe mbi të gjitha u shërben qytetarëve që respektojnë ligjet e dy vendeve.
“Marrëveshjet nuk bëhen sipas kokës së njerëzve por mbi bazën e trajtimit të barabartë dhe besueshmërisë. Kjo marrëveshje shtetërore mbron interesat e shtetit dhe qytetarëve shqiptarë, por nuk mund të devijojë për shkak se cenohen interesat e disa shqiptarëve”.
Instituti i Sigurimeve Shoqërore bën të ditur se vijojnë negociatat me Italinë dhe Greqinë për njohjen reciproke të Sigurimeve Shoqërore, çka do të sjellë dhe një marrëveshje konkrete brenda pak muajsh.
